Drive-by Shooting a laga dos hende herida den Caya St. Maarten

Testigonan mes a hiba nan pa ImSan

ORANJSTAD (AAN): Un grupo di persona kendenan Diamars marduga alrededor di 1:30 am tabata riba e cancha di Basketball den Caya St. Maarten, a wordo sorprendi ora cu un auto a pasa riba e caya, y un of mas persona a apunta un arma y a cuminza tira riba nan.

   Asina yamada a drenta na Central di Polis, unda un persona ta bisa cu tiramento a caba di socede den e caya, y cu un hende a ricibi tiro.

   Mesora Central di Polis a cuminza manda patruya di San Nicolas pa e adres.  Pero na momento cu Polis a yega den area di e cancha di Basketball, a haya e lugar full bashi.  Polisnan a baha y a cana check rond, y asina riba caya a bin haya huls abao, y riba e cancha tabatin manchanan di sanger.   A notifica Central di Polis di esey, cu a cuminza manda Recherche y team forensico di BFTO pa e lugar.

   Un rato despues, Central di Polis a ricibi informacion, cu hende cu herida di bala a yega na Servicio di Emergencia na ImSan.  Pues mesora un patruya a wordo manda pa check e asunto na ImSan.

   Dos hende herida: Polis a yega ImSan, y mesora nan a wordo notifica cu ta dos hende cu impacto di bala a wordo treci eynan door di testigonan di e tiramento den Caya St. Maarten.  Ta trata di un homber di 27 aña, y un hoben masculino di 18 aña.  Na ImSan e momento ey tabata preparando pa ambos wordo transporta cu Ambulance pa Hospital debi cu tin di bay haci maniobra pa saca e balanan.

   Polis a duna un man pa escolta e Ambulancenan pa Servicio di Emergencia na Hospital, y pa keda vigila e asunto.

   Vocero di Polis, Liliana Rasmijn a indica cu despues cu Docternan a saca bala di e ambos victimanan, a nota cu no tin nada mas grave riba nan, pues nan por bay cas.

   Drive-by Shooting: Recherche a cuminza compila informacion, y a bin haya sa cu tabata un grupo di amigo cu tabata riba e cancha di Basketball den Caya St. Maarten ta combersa, ora cu un auto y kizas un motorcycle tambe a pasa y a start cu un ‘Drive-by Shooting’.  Ningun hende sa kende ta esnan den e auto.

   Ora tiro a start, tur hende a busca forma pa cubri nan mes, pero despues a nota cu dos di nan a ricibi impacto di bala.  E amigonan mesora a actua pa logra transporta e dos heridonan pa ImSan.

   Polis- y Recherche a check tur rond di e area den Caya St. Maarten, y a bin topa cu un Motorcycle sin plachi di number, y cu kizas ta procedente di joyriding.  A confisca esaki mesora.

   Tur huls cu a wordo haya a keda confisca, y tambe a haya un smartphone abao na e lugar di sucedido.

   E investigacion ta sigui, y Polis ta haci un suplica na cualkier persona cu por a mira algo, of sa di algo di loke a socede e marduga ey, pa yama Tipline di Polis na 111-41, y corda cu bo ta keda anonimo.