Ministro Geoffrey Wever y IMF ta dialoga riba finansa publico y prioridadnan economico di Aruba

ORANJESTAD (AAN):  Minister di Finansa, Asunto Economico y Sector Primario, Geoffrey Wever,

a reuni diamars mainta cu sr. Marco Arena, IMF Mission Chief pa Aruba, pa un IMF Staff Meeting enfoca riba desaroyonan economico y fiscal reciente y prioridadnan di Aruba pa e proximo periodo. E encuentro tabata un momento importante di intercambio y preparacion den direccion di e proximo evaluacion.

   Durante e reunion, Minister Wever y IMF a trata, entre otro, revision di presupuesto 2026 y preparacion di presupuesto 2027, prioridadnan fiscal, Public Financial Management (PFM), Medium-Term Fiscal Framework (MTFF), HOFA, Fondo di Inversion, poder di compra y prioridadnan economico structural.

   Un tema importante tabata e impacto cu shocknan internacional por tin riba costo di bida. Minister Wever a splica cu Gobierno a tuma medida temporal pa mitiga aumento di prijs di combustibel, pero cu e experiencia aki ta confirma e necesidad pa Aruba conta cu un framework mas structural y dirigi pa proteccion di poder di compra.

   Gobierno ta trahando pa identifica mas precisamente e famianan cu realmente tin mester di sosten, entre otro mediante desaroyo di un definicion y mapa di pobreza. E meta di esaki ta pa recursonan publico por yega mas efectivamente na esnan cu mas tin mester di dje.

   “Finansa publico solido ta duna Gobierno e capacidad pa actua ora comunidad tin mester di esaki. Nos siguiente paso ta pa fortalece e instrumentonan cu ta permiti nos brinda sosten mas dirigi, sin compromete stabilidad financiero di pais,” Minister Wever a expresa.

   Otro punto importante tabata progreso cu policy-based budgeting. E proceso a inicia cu presupuesto 2026 y ta wordo amplia pa 2027, cu e meta di conecta recurso publico mas directamente cu prioridadnan di maneho, identifica riesgo fiscal mas trempan y fortalece transparencia y rendicion di cuenta.

   Minister Wever a informa IMF tambe cu Aruba ta proyecta pa desaroya un modelo di revenue forecasting cu asistencia tecnico di CARTAC, pa mehora calidad di proyeccion di entrada di Gobierno y fortalece planificacion presupuestario.

   E reunion a trata ademas e agenda di inversion di Aruba. Despues di añanan cu inversion insuficiente den infrastructura, scolnan y otro propiedadnan publico, Gobierno ta enfoca riba recupera capacidad productivo di pais. Den e contexto aki, nan a intercambia tocante Fondo di Inversion, portofolio di inversion, HOFA y Agri-Innovation Park.

   E direccion aki ta cuadra cu e politica pa conecta prioridadnan di Gobierno mas directamente cu recurso presupuestario y establece un fondo di inversion.

   Minister Wever a enfatisa cu, apesar di e desaroyonan positivo den entrada di Gobierno, cautela fiscal ta keda necesario. Aruba su economia ta sensibel pa desaroyonan internacional, mientras cu tin hopi gasto publico cu ta structural.

   “Nos mester sigui inverti den Aruba, proteha esnan cu mas tin mester y na mes momento mantene suficiente espacio financiero pa enfrenta cualkier reto cu por presenta. E balansa ey ta esencial pa mantene stabilidad y prepara nos pais pa futuro,” Minister Wever a conclui.