Sindicato SPA ta alerta pa perdida di personal den Cuerpo Policial

Segun presidente di SPA, Lito Lacle:

• Tambe ta pidi mehoramento di salario y condicionnan laboral 

ORANJESTAD (AAN): Cuerpo Policial ta enfrenta un perdida preocupante di personal, segun presidente di SPA, Lito Lacle. Den e ultimo dos lunanan, shete polis a pidi ontslag of traslado, mientras dos empleado civil tambe a entrega nan carta pa termina nan servicio. Segun Lacle, e desaroyo aki ta subraya e necesidad pa mehora salario y condicionnan laboral pa retene personal capacita.

   Durante un reunion cu mando policial dIamars siman pasa, SPA a presenta varios preocupacion relaciona cu e situacion di personal. Lacle a indica cu e reunion a tuma lugar den un bon ambiente, cu espacio pa trece e problematicanan dilanti.

   Di e shete polis menciona, seis a pidi ontslag cu efecto inmediato y un a pidi traslado. Segun Lacle, el a logra convence un di e seisnan pa adapta su peticion pa BVD. Adicionalmente, dos empleado civil a entrega nan carta siman pasa: un a termina su servicio dia 1 di october y e otro lo sali dia 1 di november.

   Lacle a señala cu e preocupacion ta bay mas leu cu e salidanan reciente. Segun e cifranan cu SPA tin disponibel, e cuerpo ta enfrenta e salida di un total di 32 agente policial den e proximo cinco añanan, incluyendo e shete casonan menciona. E presidente a agrega cu e sa di otro Polisnan tambe cu a solicita trabao pafor di e cuerpo, pasobra nan no kier continua den servicio policial.

   Un di e principal motibonan, segun Lacle, ta e salario. El a indica cu un agente den opleiding ta cuminsa cu un salario bruto di 2.655 Florin, cu ta resulta den aproximadamente 2.300 Florin netto pa luna. Segun e presidente, tin agente den opleiding cu ya ta pidi permiso pa haci trabao adicional pa complementa nan entrada.

   Pa ilustra e presion financiero, Lacle a referi na un cifra di aproximadamente 6.000 Florin pa luna cu, segun su declaracion y referencia na CBS, un famia di cuater persona tin mester pa cubri su necesidadnan. Den e contexto aki, el a cuestiona si e salario inicial ta suficiente pa un empleado cu responsabilidad familiar.

   E presidente di SPA a sostene cu e problema di salario ta toca tambe e rangonan mas halto. Como ehempel, el a menciona cu un persona den rango di inspector, ta ricibi 6.695 Florin netto pa luna. Tambe el a señala cu dos comisario recientemente a ricibi un bevordering cu a representa un aumento di solamente 55 Florin.

   Segun Lacle, pa retene coleganan den e cuerpo, ta necesario pa busca maneranan concreto pa mehora nan salario. E revision aki mester inclui tambe e beneficionan secundario. El a menciona un ehempel, cu ta e kindertoelage cu te ainda ta 55 Florin pa e prome mucha y 50 Florin pa e di dos. SPA ta considera cu e sumanan aki tambe mester wordo aumenta.

   Lacle a enfatisa cu e reto no ta solamente pa aumenta e cantidad di personal, sino tambe pa conserva e calidad y experiencia den e organizacion. Segun e presidente, ta esencial cu coleganan cu completa nan opleiding ta haya suficiente perspectiva pa continua nan carera den Cuerpo Policial.

   El a agrega cu e reconocimento di e opleiding MBO ta duna coleganan oportunidad pa solicita trabao den otro organizacionnan. P’esey, segun Lacle, inverti den formacion mester bay hunto cu condicionnan laboral cu ta motiva personal pa keda.

   SPA ta pidi pa atencion pa e perdida di personal y ta considera mehoramento di salario y beneficionan secundario como un paso necesario pa fortalece e capacidad y continuidad di Cuerpo Policial.