Parlamentario Shailiny Tromp-Lee a pidi reunion cu Minister di Labor pa trata reorganisacion di DAO y DPL

ORANJESTAD (AAN): Parlamentario di Fraccion di MEP, drs. Shailiny Tromp-Lee, a manda un carta oficial pa Presidente di Comision di Labor, sr. Clifford Heyliger, pa pidi pa facilita y yama un reunion cu Minister di Labor. 

E meta di e reunion aki ta pa trata puntonan di gran importancia relaciona cu e area laboral y e situacion actual di nos mercado di trabou na Aruba.  

Den e carta manda dia 29 di September 2026, e parlamentario a resalta cuater punto clave cu mester di atencion y claridad:  

• Reorganisacion di DAO y DPL: Reorganisacion di DAO y DPL, incluyendo e implicacionnan pa e funcionamento y prestacion di servicio di ambos departamento.  
• E situacion actual na pia di trabou di DAO y DPL: E desafionan cu e personal ta enfrenta y e impacto cu esaki tin riba e servicio na pueblo.  
• Introduccion di salario minimo pa hoben: E status actual di e introduccion aki y e siguiente pasonan cu mester wordo tuma pa su implementacion por bira porfin un realidad. 
• Update tocante inspeccion y handhaving: Un bista riba e capacidad actual, e accionnan cu ta tuma luga y e pasonan necesario pa garantisa e cumplimento cu leynan laboral.  

"Mi ta kere cu un reunion directo cu e Minister ta importante pa por haya claridad tocante e puntonan aki, intercambia informacion y identifica caminda cu por tin pa mehora e situacion na trabou y pa e hendenan cu ta depende di e servicio," e parlamentario a enfatisa.