‘E problema di sucu ta grandisimo na Aruba y Centro Diabetico mester mire mas global’

Dr. Monica Nuboer, Coordinador Medico ImSan:

ORANJESTAD (AAN) Dr. Monica Nuboer-Gonzalez, Coordinador Medico di Instituto Medico San Nicolas (ImSan), a elabora riba e malesa di suco (Diabetes) den un entrevista cu DIARIO.

El a expresa cu e Centro Diabetico di ImSan, berdaderamente ta crece, pero mas cu un Centro Diabetico mester mir’e na un forma mas global.

   “E problema di sucu ta grandisimo na Aruba. Esey tambe a wordo registra. Na 2023 tabata tin un estudio di Steps cu a wordo haci door di DVG anto eynan por a wak cu tabata tin un crecemento. Pero  na e momentonan aki, e crecemento ta tur caminda. Nos tin un Oogpoli, cu ta crece. E problemanan di retina, Dialisis, pashentnan cu tin wordo dyaliza, cu ta bira cada bez mas. Esey tambe nos ta wak”, dr. Monica Nuboer a señala.

   Por papia di edad si, pero segun dr. Nuboer hopi hende hoben aworaki, tin problemanan cronico. “Nos no tin Pediatria akinan, pues mi no por papia aworaki di muchanan hopi jong, pero mi por bisa cu antes, problemanan di retina tabata comun den personanan di sesenta aña, aworaki bo ta haya personanan hoben, di 25- 30 aña, cu ya caba tin e problemanan aki. Nos tin cu compronde cu obesidad y sobrepeso ta trece cu ne cu dado momento bo por bira diabetico. No tur hende, tin hende ta core cu e riesgo pero tin suerte cu nan no ta haye, pero mayoria di biaha si. Ta diabetico ta un problema, y si bo tin’e bo tin cu control’e. Tanten cu bo tin’e controla, bo por biba un bida normal, pa hopi aña”, Dr. Nuboer a indica.

   El a agrega cu na momento cu bo no ta controla e sucu y esaki ta constantemente halto, e sucu ta ataca e adernan chikito, anto mayoria di biaha unda bo tin mas adernan chikito: na bo pia, na bo dedenan, bo ta perde gevoel di bo nervionan, na bo riñon, anto bo tin cu bay na dyalise, of na bo wowo anto bo ta bira ciego y prome cu bo bira ciego bo ta haya problema cu bista, pero bo por bira ciego hopi rapido.

“Anto, mi ta haya cu bo mester cuminza educa nos hendenan y educacion no ta solamente sinta pensa un rato ‘kico mi docter di cas ta bay haci pa mi, of kico e ta bay bisa mi’. No, educacion ta bin di tur caminda. E ta bin di mi mes, pa mi mes busca pa sa kico ta pasando cu mi curpa: mi sucu ta halto, kico mi ta bay haci na mi mes tambe?’ Si bo ta un persona cu ta un dunador di trabao, kico bo ta bay haci pa bo empleadonan? No mester ta hopi, pero bo mester pensa algo, y esaki ta un mensahe pa tur e hendenan cu tin companianan; si bo empleadonan cu ta diabetico tin nan sucu bao control, AO ta baha, no solamente na e momento ey, pero na data largo tambe, pasobra e  persona ey sa cu e ta take care,” Dr. Monica Nuboer a trece dilanti.