Hues a bolbe pospone caso penal contra Fernandes Pedra sospecha di a hit & run dilanti mall

Na ultimo ora e acusado a haya sa di tin un abogado sin por a papia cun’e

ORANJESTAD (AAN): Diabierna mainta tabata planea pa Corte cuminza cu tratamento di e caso penal contra Chania Chante Fernandes Pedra di 25 aña. Sinembargo a presenta situacion cu Hues a dicidi di pospone e caso pasobra ainda Fernandes Pedra no a haya un abogado.

   Acusacionnan: Fiscal a presenta e acusacionnan contra Fernandes Pedra cu ta, cu riba 2 Januari 2025 a dal mata e dama Josely Paulina Vasquez di 65 aña y e homber Carlos David Vialez Valerio di 54 aña cu un SUV tipo Jeep Compass y a sigui core bay. Tambe Fiscal ta acusa Fernandes Pedra di tabata core e Jeep sin rijbewijs, core bou influencia di alcohol, core cu velocidad halto y den un situacion emocional. Tambe Fernandes Pedra ta wordo acusa di intento di mata dos otro hende, esta un docente di MAVO, señora Williams y e homber Fernandes Rivas, kendenan dia 2 Januari 2025 tambe tabata cruzando e caminda.

   Problema pa haya abogado: Via video conference e abogado mr. Dickens di Curacao a conecta cu Corte di Husticia. Famianan di e victimanan tabata presente sinta abao mientras cu den di dos piso e famia di Fernandes Pedra tabata sinta.

   Hues a bisa cu na Augustus 2026 el a dicidi cu por busca abogado di Curacao. Tabatin dos abogado dispuesto. Hues a mustra cu cos no a bay manera a spera. Hues a bisa cu e abogado mr. Dickens di Curacao no a haya e tempo pa papia cu e acusado. Esey ta haci cu Hues a pensa pa pospone e caso pa 4 November 2026.

   Hues a bisa cu a haya mas documentonan cu tabata pendiente di haya pa tratamento di e caso. A haya e investigacion riba e computer di e Jeep. Tambe a haya raport di psicologo di Fernandes Pedra.

   Carta pa pospone caso: Hues a bisa cu Diahuebs, Fernandes Pedra a laga entrega na Hues di Corte di Husticia, un carta caminda abogado mr. Braam Moszkowicz for di Hulanda a pidi pa pospone e caso.

   Tambe Hues a haya email di mr. Dickens cu e ta dispuesto pa representa Fernandes Pedra. Den e carta di Fernandes Pedra, e ta bolbe pidi pa e haya su libertad.

   Acusado ta pidi disculpa na famianan: Na dado momento Fernandes Pedra mester a bisa tocante e situacion di abogado. Promer el a pidi disculpa na famianan di e victimanan.

   El a bisa cu ainda ta hopi dificil p’e por expresa su mes. E tabata hopi emocional y a bisa cu no tabata su intension. El a bisa cu mentalmente ta hopi dificil p’e.

   Acusado no a papia cu e abogado: Hues a bisa cu el a haya mail di mr. Dickens cu e ta representa Fernandes Pedra. Fernandes Pedra a bisa Hues cu e no tabatin combersacion cu mr. Dickens. El a bisa cu e sa cu tin dos otro abogado y tabata pendiente di nan pero no a tende nada mas. Hues a bisa cu e tambe a tende di dos abogado for di Corsou pero despues ta resulta cu tabatin mal comprondemento y nan no ta bin.

   Hues a sigui bisa cu mayornan di Fernandes Pedra a laga sa cu nan no ta dispuesto pa sigui paga abogado. Hues a bisa cu e procedura a sigui y finalmente mr. Dickens a pone su mes disponibel.

   Fernandes Pedra a puntra Hues si e tin mas opcion pasobra e no a aproba mr. Dickens. Hues a puntra Fernandes Pedra kico e kier. Fernandes Pedra a puntra Hues si e por scoge abogadonan di Corsou. Hues a bisa cu esey por si tin abogado disponibel.

   Hues a remarca cu esaki ta di 3 biaha cu Fernandes Pedra ta presenta den Corte sin abogado. Fernandes Pedra a bisa Hues cu e no conoce mr. Dickens, e no sa su specialisacion. El a bisa cu e ta depende di documentonan cu e ta haya na KIA.

   Fiscal a reacciona cu ni na Aruba y na Corsou, no tin abogado disponibel. Solamente mr. Dickens di Corsou. E ta haya cu no tin espacio mas pa busca otro abogado pasobra no tin. Fiscal a bisa tambe cu e kier aclarea cu no ta Ministerio Publico a busca abogado sino cu a haci un peticion na e orden di abogado na Corsou.

   Acusado no kier e abogado: Hues a puntra Fernandes Pedra si e kier mr. Dickens of no. Fernandes Pedra a bisa Hues, cu tur respet pa mr. Dickens, pero e no kier mr. Dickens.

   Hues a remarca cu Fernandes Pedra a nenga mr. Dickens y ta core e riesgo cu no tin abogado. mr. Dickens a bisa Hues cu e no por haci nada otro cu deshaci di e caso.

   Hues no ta laga e muhe hoben liber: Fiscal a nenga e peticion di Fernandes Pedra pa e bay liber. Fiscal a remarca cu 2 hende a perde nan bida y 2 otro a hera perde nan bida. Fiscal a bisa cu segun ley tin un castigo di 8 aña di prizon. E no ta haya cu por laga Fernandes Pedra liber. Fiscal a bisa cu dia 4 November 2026, tratamento di e caso mester tuma lugar. Esaki pa e famianan di e victimanan y Fernandes Pedra mes.

   Hues a pospone e caso un rato pa e bay pensa y a bolbe. Hues a bisa cu e ta rechaza e peticion pa Fernandes Pedra bay liber. Na opinion di Hues, no tin ningun motibo pa laga Fernandes Pedra liber. Hues ta haya cu e caso ta pisa mas cu e interes di Fernandes Pedra pa bay liber. Hues a bisa cu esaki ta di 3 biaha cu e ta mira Fernandes Pedra den Corte y ainda no a trata e caso.

   Caso posponi: Hues a mustra cu riba peticion di Ministerio Publico, a haya un abogado y pa motibonan no conoci, Fernandes Pedra no kier e abogado. Hues a remarca cu awor e bala ta atrobe den scochi di Fernandes Pedra. Hues a bisa cu a bira tempo pa trata e caso.

   Hues a pospone e caso y a bisa cu dia 4 November 2026 lo bay trata e caso pa 1:30’or di merdia.

   Famia di Fernandes Pedra ta cuestiona: Pafor di edificio di Corte, mayornan di Fernandes Pedra a cuestiona henter e procedura pa hayamento di abogado. Segun e mayornan, 16 ora promer cu e caso, a apunta mr. Dickens, siendo cu promer cu esey tabatin 2 abogado disponible pa Fernandes Pedra scoge.

   Por a compronde cu otro siman lo por spera cu e mayornan di Fernandes Pedra lo yama un conferencia di prensa pa cuestiona e asunto aki.