Falta di liderazgo y vision di Minister Wyatt-Ras ta perhudica calidad di cuido na Aruba

Parlamentario Hendrik Tevreden:

ORANJESTAD (AAN): E retonan operacional y di maneho cu nos hospital ta enfrentando no ta asuntonan cu por wordo resolvi simplemente pa medio di acusacionnan contra e personal, ni tampoco declarando cu tur cos ta culpa di e directiva. Segun Parlamentario Hendrik Tevreden, maske ta fundamental pa cualkier falta di cumplimento of iregularidad wordo investiga rigurosamente y tuma e medidanan adecuado, e responsabilidad di liderazgo politico no ta disparce: Minister Wyatt Ras tin e obligacion constitucional di duna direccion strategico, coordina e sector y informa tanto Parlamento como pueblo di Aruba di manera transparente. 

Falta di liderazgo político den e crisis hospitalario

Segun Tevreden, e pregunta principal cu mester wordo contesta ta: unda e liderazgo di Minister Wyatt-Ras ta den e crisisnan cu nos ta mira den e sistema hospitalario?

E parlamentario a cuestiona ken ta pone prioridad pa atende e situacion aki, con e minister ta coordina cu Hospital, Organo Ehecutivo AZV y Directie Volksgezondheid (DVG), y unda tin un plan concreto, cu fecha di ehecucion y resultadonan cu por wordo midi. 

E consecuencia directo di e falta di direccion politico aki ta cay directamente riba e pashent. Tevreden a señala cu e ta inaceptabel cu hospital ta mantene salanan di operacion cera y ta reduci e cantidad di camanan disponibel pa uzo. E inaccion aki ta provoca cu e listanan di espera pa atencion medico ta sigui aumenta, e personal di cuido ta birando demotiva, y consecutivamente e calidad general di e cuido na Aruba ta sufri un deterioro preocupante. 

Contractnan cuestionabel y falta di un plan coherente

Los di e problema structural na hospital, Parlamentario Hendrik Tevreden a trece dilanti e existencia di un Ministeriële Beschikking, di fecha 15 di september 2026, cu ta autorisa un contract directo pa fortifica, modernisa y digitalisa e cuido di salud mental y adiccion. E contract aki ta encera un suma maximo di Afl. 194.400 pa un periodo di poco mas di ocho luna, caminda e documento oficial ta hustifica e gasto aki sosteniendo cu e experticio necesario no ta disponibel actualmente na Aruba. 

Segun Tevreden, e argumento aki ta un bofta den cara di tur e profesionalnan cu ta traha incansablemente den e sector di adiccion y salud mental. Tevreden a cuestiona e decision di compromete fondonan publico pa adkiri informacion cu ya caba a wordo elabora pa nos expertonan local den e tereno. Pa e parlamentario, e maneho aki den e prome fasenan di gobernacion ta manda un señal demotivante di kico e pais por spera bou di e mando di Minister Wyatt-Ras den salubridad publico. 

Responsabilidad politico no por wordo evita

Parlamentario Tevreden a aclaria cu e meta di su posicionamento no ta pa hiba un conflicto personal, sino pa subraya e deber primordial di un mandatario: dirigi e departamentonan pa nan mehoracion y garantisa un uzo eficiente y responsabel di e fondonan publico. 

Maske e minister ta indica cu e ta realisando investigacionnan riba loke a bay fout na hospital, Tevreden a remarca cu e investigacionnan aki no por wordo uza como un escudo pa desvía di e responsabilidad politico ni pa pospone decisionnan urgente. 

E parlamentario a conclui afirmando cu e sector di salubridad publico na Aruba mester di un liderazgo cu ta duna vision, coordina cu eficacia y rindi cuenta debidamente na Parlamento. Mientrastanto cu e tension den e sector ta sigui escala y tempo ta pasa, e ausencia di un plan coherente di e minister ta sigui perhudica e bienestar y e calidad di cuido di e pueblo di Aruba.