Meverly Romano ta splica e registracion cu login y siguridad di cuenta BOi

Relacionista publico di DIMP

• No tin problema cu e sistema 

ORANJESTAD (AAN): Departamento di Impuesto (DIMP) ta aclaria e proceso di registracion y login den portal BOi, despues di ricibi diferente pregunta di usuario cu ta experimenta dificultad pa haya acceso na nan cuenta.

   Esaki, segun Meverly Romano, relacionista publico di DIMP, no kiermeen cu tin un problema cu e sistema sino cu e proceso con e registracion a bay.

   El a splica cu ora un persona of comerciante registra pa un cuenta BOi, e sistema ta controla si e informacion yena, entre otro datonan personal y persoonsnummer, ta corecto y ta cuadra cu e datonan registra cerca Departamento di Impuesto.

   Ora tur informacion ta corecto, usuario mester ricibi tres e-mail: un confirmacion di e peticion di registracion, un e-mail cu informacionnan di usuario y un tercer e-mail cu un “one-time password”, esta un contraseña temporal cu por wordo uza solamente un biaha.

   Normalmente e mensahenan aki mester drenta dentro di aproximadamente 15 pa 20 minuut. Si usuario no ricibi ni un solo e-mail, e no mester registra di nobo. E mester controla su folder di spam y despues tuma contacto cu DIMP pa verifica su informacion. Segun Romano, un problema cu ta ocuri regularmente ta cu usuario ta yena su adres di e-mail robes, causando cu e mensahenan no por wordo entrega.

   Durante e prome login, usuario mester yena e contraseña temporal, crea y confirma un contraseña personal, scan e codigo QR cu su aplicacion di autenticacion y scoge tres pregunta di siguridad. Despues, cada login lo rekeri tambe un codigo di seis cifra genera door di e aplicacion di autenticacion multifactor, conoci como MFA.

   Romano ta recorda usuario cu contraseña ta sensitivo y ta diferencia letter mayusculo y minusculo. Diferente intento cu un contraseña incorecto por causa cu e sistema ta blokia e cuenta automaticamente como medida di siguridad. Segun Romano, door di yena contraseña robes, hopi hende ta pensa cu e portal tin problema, cual no ta e caso.

   Ora un cuenta ta blokia, usuario mester tuma contacto cu DIMP pa kita e blokeo. Den mayoria di caso, Departamento di Impuesto tambe lo reset e contraseña y manda un contraseña nobo via e-mail.

   DIMP ta recomenda usuario pa warda bon e contestanan di nan preguntanan di siguridad. Si e persona cambia of perde su telefon, e informacion aki ta necesario pa reset MFA y instala e cuenta riba un aparato nobo.

  Debido na e volumen grandi di e-mail cu DIMP ta ricibi, contestanan por tarda. Pa problema urgente cu acceso, blokeo of contraseña, usuario ta wordo recomenda pa yama Departamento di Impuesto pa registra e caso y ricibi asistencia.