Parlaemntario ta reconoce hopi reto den enseñanza

Vicepresidente di Parlamento Muzaninn Wever: 

ORANJESTAD (AAN)-- Den un entrevista cu Parlamentario Muzaninn Wever, Vicepresidente di Parlamento, el a expresa su bon deseonan pa tur studiante cu ta bay cuminza scol e siman aki, pa nan tin un aña escolar exitoso.

   El a señala cu enberdad tin hopi reto den enseñanza. E ta kere cu despues cu pa hopi aña cu inversion no a wordo destina pa renovacion di scolnan, pa bin cu material, etc., e problema ta crece pasobra un edificio cu a wordo neglisha no ta drecha asina sin mas.

   “Bisando esey atrobe, e gobierno nobo a sinta y a haya tur e retonan aki, y tin asina hopi problema cu mester wordo atendi, y mi ta compronde cu ningun hende kier tende e palabra ‘pasenshi’ pasobra nan a tene pasenshi caba pa hopi aña, y no ta agradable tampoco pa nan. Nan kier un solucion y mi sa cu Minister Gerlien Croes ta bezig cu e solucion tambe”, Parlamentario Muzaninn Wever a declara.

   El a agrega cu e ta na haltura cu e edificio cu no ta bao control di gobierno, ta keda na e directivanan di scol pa nan bin cu un presupuesto, pa entrega esaki pa e tipo di asuntonan aki por wordo soluciona, pa e minister atende cu nan.

   “E minister no por bay na un schoolbestuur bise cu e ta wak cu nan scol ta daña. Y tambe mañan e berstuur ta rabia si minister bin mete den nan solucion. Bo mester mantene bo sinergia manera cu el a wordo realiza, si no, laga elimina tur schoolbestuurs y laga Minister dicidi riba tur cos.  Mi no ta kere esey ta bay ta e solucion tampoco. E schoolbestuurnan ta esnan cu ta haci e trabao pa mehora”, segun Parlamentario Muzaninn Wever a indica.