Cuida Naturalesa ta cuida nos Bon Comun

Premier Eman riba Dia Mundial di Conservacion di Naturalesa:

ORANJESTAD (AAN): Awe 28 di juli, ora ta conmemora Dia Mundial di Conservacion di Naturalesa, nos ta recorda cu naturalesa no ta algo separa di nos; e ta parti di ken nos ta como pueblo. Nos playanan, nos cunucu, nos mondi, nos zona ecologico, nos rifnan di coral y nos biodiversidad a forma identidad di Aruba pa generacionnan. Nan ta brinda nos aire y awa limpi, ta fortalece nos economia, ta enrikece nos calidad di bida y ta recorda nos di nos responsabilidad pa cu otro y pa esnan cu lo bin despues di nos.

   Proteha naturalesa, no ta simplemente un responsabilidad ambiental. E ta un expresion di nos compromiso cu e bon comun. E decisionnan cu nos ta tuma awe lo determina cua Aruba nos lo laga pa nos yiu y nietonan. Cada mata cu nos planta, cada costa cu nos restaura, cada especie cu nos proteha y cada ciudadano cu ta scoge pa cuida nos isla ta contribui na un Aruba mas fuerte, mas saludabel y mas resiliente.

   Prome Ministro Mike Eman a duna e siguiente relato: Como comunidad, nos tur ta comparti e beneficionan di ecosistemanan saludabel. Naturalesa ta proteha nos contra e efectonan di cambio climatico, ta contribui na nos bienestar, ta sostene nos economia turistico y ta preserva e beyesa unico cu ta caracterisa Aruba. Conservacion no por cay unicamente riba gobierno. E ta exigi un sociedad unda ciudadanonan, empresanan, scolnan, NGO-nan, cientificonan y institucionnan publico ta traha hunto como partnernan den e cuido di nos cas comparti.

   Nos ta encurasha pa e pasonan importante cu Aruba ta tuma rumbo na e futuro ey. E aña aki, Aruba cu orguyo a ricibi su designacion como Reserva UNESCO Man and the Biosphere (MAB), un reconocemento internacional cu ta habri oportunidadnan nobo pa investigacion cientifico, monitoreo ambiental, intercambio di conocemento y maneho sostenibel di nos recursonan natural. Na mes momento, nos Minister di Turismo a brasa e transicion pa un modelo di turismo regenerativo, un modelo cu no solamente ta aspira pa reduci nos impacto riba naturalesa, sino tambe pa restaura ecosistemanan activamente y haci cu turismo ta laga Aruba den un miho estado cu ora el a yega.

   E logronan aki ta pertenese na tur Arubiano. Nan ta resultado di aña di dedicacion di hendenan cu ta kere den e isla aki y cu, den silencio, ta traha tur dia pa proteh’e. Riba e Dia Mundial di Conservacion di Naturalesa aki, nos ta expresa nos sincero gratitud na organizacionnan ambiental, voluntarionan, investigadornan, educadornan, gruponan comunitario y e cantidad incontabel di ciudadanonan, cu nan compromiso, a yuda proteha patrimonio natural di Aruba. Nan trabao ta mustra cu cambio duradero ta construi cu perseverancia, colaboracion y amor pa nos isla.

   Nan ta orguyoso di reconoce e siguiente organizacionnan pa nan contribucion invaluabel na conservacion di naturalesa na Aruba: (*) Accion Ambiental, (*) AMISTAD (Aruba Management Institute for Sustainable Development). (*) Animal Rights Aruba. (*) Aruba Animal Shelter. (*) Aruba Birdlife Conservation. (*) Aruba Circular Economy Foundation.

   Tambe tin: (*) Aruba Conservation Foundation (ex Foundation Parke National Aruba). (*) Aruba Lion Fish Initiative Foundation (ALFI). (*) Aruba Marine Mammal Foundation. (*) Aruba Reef Care. (*) Aruba Sustainable Development Foundation. (*) Caribbean Lionfish Alliance. (*) Centro Ecologico Aruba. (*) Circular Economy Aruba. (*) Climate Action Aruba. (*) Compost Club Aruba. (*) DarkSkyInternational Aruba. (*) Ecoprofile. (*) Equilibrium.

   Demas tin: (*) Fundacion Aruba Conciente. (*) Fundacion Aruba Limpi. (*) Fundacion Arubano pa Naturalesa y Parke. (*) Fundacion Ban Lanta y Planta. (*) Fundacion Centro di Pesca Hadicurari. (*) Fundacion Desaroyo Ecologico Arubano. (*) Fundacion Preserva Malmok. (*) Fundacion Proteccion y Conservacion di Commandeursbaai. (*) Fundacion Proteha Abeha Aruba. (*) Fundacion Salba Nos Burico. (*) Fundacion Savaneta Aruba. (*) Fundacion Sero Cristal.

   Tambe tin: (*) Impact Blue Foundation. (*) Luna Foundation Aruba. (*) MAGEC. (*) Metabolic Foundation. (*) ProBiMar. (*) Rainbow Warriors Aruba. (*) Scubblebubbles Foundation. (*) Sociedad Iginiero di Aruba. (*) Space and Nature Aruba Foundation. (*) StimAruba. (*) Stichting Parkietenbos Aruba. (*) Stichting Serenity & Milieu. (*) TurtugAruba. (*) Zero Waste Aruba.

   Dia Mundial di Conservacion di Naturalesa tambe ta un invitacion pa cada un di nos reflexiona riba e rol cu nos por hunga. Nos no tur ta contribui di e mesun manera, pero nos tur por contribui.

   E 3 forma pa mustra amor pa Aruba: Haci trabao di boluntario den actividadnan ambiental di bo comunidad. Participa den accionnan di limpiesa, iniciativa di plantacion di mata, proyectonan di restauracion di habitat of otro actividadnan di conservacion organiza pa ONG-nan local enfoca riba naturalesa.

   Sostene conservacion mediante donacion. Hopi organizacion ta depende di apoyo di comunidad pa por sigui cu nan trabao importante. Cada contribucion, grandi of chikito, ta yuda proteha patrimonio natural di Aruba.

   Mantene bo mes informa, educa bo mes y comparti conocemento. Siña tocante e ecosistemanan unico di Aruba, comparti e conocemento ey cu bo famia y amistad, y anima otro pa bira guardian activo di nos medio ambiente.

   Futuro di Aruba no ta determina unicamente pa gobierno. E ta forma pa tur di nos, door di e decisionnan cu nos ta tuma, e balornan cu nos ta transmiti y nos disponibilidad pa pone e bon comun riba nos interesnan individual.

   Hunto, cu speranza, responsabilidad y un sentido comparti di cuido, nos por laga pa futuro generacionnan un Aruba mas berde, mas resiliente y aun mas bunita cu e Aruba cu nos a hereda.

Felis Dia Mundial di Conservacion di Naturalesa.