Pius-X Scol cu ta normal di 12 Klas pero pa otro aña escolar ta cuminza cu 6 klas so

Presidente di Parlamento Marlon Sneek:

ORANJESTAD (AAN) -- Presidente di Parlamento, señor Marlon Sneek, a sigui elabora den entrevista cu Matutino DIARIO, tocante e tema di enseñanza, den cual tereno e tin su experiencia como meneer di scol. Manera ta conoci, e tabata maestro na Pius-X Scol.

   Marlon Sneek a menciona cu nan ta mira retonan cu material cu nan a keda cla, por garantiza cu e scolnan por haya e material adecua pa por traspasa e conocemento cu mester wordo transmiti na e alumnonan.

   El a señala cu tin desaroyonan positivo tambe, manera locual Minister di Enseñanza a anuncia, di e posibilidad di haci MAVO den dos aña. “Kiermen, nos ta wak cu ta purba di atende cu e retonan cu tin, p’asina garantiza cu nos hobennan ta keda haya siñamento interesante. Si nos mira e desaroyonan di awendia, casi por bisa cu un hende no por drenta un trabao y di e trabao ey e ta bay cu pensioen. Si e no sigui prepara su mes, na e momento cu e ta den e trabao ey, e ta bay cay full a atras cu e riesgo cu e por perde e trabao aki”, Presidente di Parlamento a señala.

   El a subraya cu antes e tabata algo simpel, pero awo tur tereno di trabao ta keda exigi di e trahado pa e keda competitivo y sigui garantiza su cupo di trabao.

   Sneek a trece otro dato interesante cu ta parti di e retonan cu tin den enseñanza, pero tambe pa Aruba como pais.

   Sneek a referi na su mes scol cu ta Pius-X Scol na Dakota. “Pius-X tabata un scol di 12 klas, y e otro aña escolar e ta cuminza cu 6 klas. Kiermen, poco, poco nos tin menos hoben. Y esaki ta nifica tambe un impacto pa scol secundario. Pasobra ora bo ta papia di Pius-X bo ta papia di un scol basico, y esey ta algo cu no solamente ta pasando na Dakota, pero na Aruba den su totalidad”, Presidente di Parlamento Marlon Sneek ta señala.

   NOTA DI REDACCION: Aki DIARIO ta remarca cu esaki ta di compronde, como cu na Mei 2026 mes DIARIO a publica con Oficina Central di Estadistica a bati alarma di un caida historico den e tasa di nacemento na Aruba.  E cantidad di nacemento a baha bao di e nivel cu ta necesario pa un poblacion keda mesun grandi.  El a cay te na minimo di 7.5 nacemento pa 1.000 persona.  E caida aki a pone cu e necesidad pa construi mas scol ya no tey mas, y ta un di e motibonan tambe pakico John Wesley College a wordo cera, como cu nan no tabata haya alumno pa registra mas.