ATA ta inverti den otro atraccionnan riba e isla pa soluciona e problema di congestion na beachnan

Segun CEO di ATA señora Ronella Croes:

ORANJESTAD (AAN): CEO di Aruba Tourism Authority (ATA), señora Ronella Croes a comenta na DIARIO den un entrevista recien cu ATA ta keda maneha turismo cu strategia y vision specialmente pa atende cu e congestion cu tin specialemente na nos beachnan. Segun e, na dado momenta ATA mester monitoria e volumen y percura pa nos producto ta na un nivel cu ta cuadra cu e vision pa cu turismo y e producto turistico cu ta Aruba.

   “Mi no ta bisa cu nos turismo ta malo. Nos bishitantenan ta satisfecho. Pero tin hopi residente cu ta menos satisfecho. Nos ta midi esaki y nos ta scucha nos comunidad”, señora Croes a expresa.

   El a duna di conoce cu comunidad ta central den tur loke cu ATA ta haci por lo tanto ATA ta duna comunidad e oido pasobra e ta parti integral di bienestar di nos turismo. Si comunidad no ta presente, y no ta mustra e grado di satisfaccion segun e vision di ATA, mester atende cu esaki.

   E CEO di ATA a remarca cu congestion di e cantidad di hende na nos beachnan na mesun momento, ta keda un tema importante y ATA ta atediendo cu esaki. El a duna di conoce cu ATA ta inverti den otro atraccionnan riba nos isla pa asina hiba e turistanan conoce otro parti di nos isla y motiva nan pa bishita e atraccionnan aki mas.

   El a agrega cu tin un investigacion andando den e awanan di Bushiri pa wak e posibilidadnan pa crea un beach cu ta mas agradabel pa usuarionan. Ta inverti na Sero Colorado na San Nicolas pa move mas hende eynan. A inverti na Ayo Rock Formation pa duna bishitantenan mas informacion. Ta traha hunto cu Aruba Conservation Foundation riba posibilidadnan pa crea atraccionnan cu ta na agrado di nos bishitantenan y brinda nan experiencianan nobo teniendo cuenta cu preservacion di naturalesa.

   E terminologia den turismo pa e maneho aki ta Visitor Flow Management. “Esaki ta un topico hopi importante y ta netamente loke cu ATA ta purba haci den caso di congestion na cierto momentonan mientras ta tene cuenta cu e vision y strategia integral di ATA pa stabilisa y no crece desproporcionalmente hopi den e proximo periodo cu nos mester vigil’e, hala rosea, inverti den e producto turismo y percura cu e eleva den calidad y sigui ahusta e strategia. Meimei di tur esaki, nos por tin un Aruba sumamente fuerte”, señora Ronella Croes a termina bisando.