Temblor registra Diahuebs anochi poco pabao di Aruba

ORANJSTAD (AAN): Diahuebs anochi pa exactamente 10:00:06 pm a registra un temblor den fondo di lama poco pabao di Aruba.

   E epicentro a wordo localiza na 12.36º Nort y 70.53º West.  Esaki ta exactamente 54 km West-Zuidwest di Punta Brabo (cerca di Eagle Beach) na Aruba.  E ta igual cu 59 km Zuidwest di Beach di Arashi na Aruba.  E ta igual cu 60 km West-Zuidwest di De Palm Island na Aruba.

   El a registra un magnitud chikito di 2.5º riba Scala di Richter.  E tabata na un profundidad menos di 30 km bao subsuelo di lama.  Ningun informe a drenta di hende cu a sinti algo di e temblor aki di 10’or di anochi na Aruba.

   VENEZUELA: Mientras tanto, na Venezuela e cantidad di “Aftershocks” cu a keda registra despues di e dos temblornan devastador di Diaranson anochi trempan, a sobrepasa ya caba 120 total, y mayoria ta den area di estado La Guaira, estado Aragua, y estado Carabobo.  Uno di nan a hasta registra Diaranson anochi pa 7:39 pm cu magnitud di 4.2º.  E Aftershock ey tabata como 115 km Oost-Zuidoost di Willem Toren na e parti mas pazuid di isla di Bonaire.