Gobierno ta sigui fortalece proteccion di consumidor cu e cuminsamento di ‘handhaving’ pa prijsnan di canasta basico

Ministro Geoffrey Wever:

ORANJESTAD (AAN): Minister di Finansa, Asunto Economico y Sector Primario Geoffrey Wever a indica cu gobierno di Aruba ta sigui tuma paso concreto pa fortalece e proteccion di e consumidor. Entrante 15 di augustus promixo ta cuminsa oficialmente cu e handhaving pa supermercado cu ta bende producto di e canasta basico mas caro e prijsnan maximo establece pa e productonan di canasta basico.

Esaki ta otro paso concreto den e maneho di Gabinete APP-Futuro pa fortalece e proteccion di e consumidor y pa garantisa cu famianan Arubano ta paga prijsnan husto pa productonan esencial den supermercado.

   Departamento di Asuntonan Economico, Comercio y Industria (DEACI), ta controla diariamente prijsnan di aproximadamente 1.300 producto den e canasta basico na supermercado- y minimarketnan rond di Aruba. Te ainda, ora durante e controlnan a wordo constata cu un prijs tabata pasa e maximo permiti, e departamento por a duna solamente un advertencia pa e comerciante haci e ahustacion(nan) necesario.

   Cu e cambio reciente den e maneho Gobierno awor a crea e base legal pa haci handhaving efectivo. Esaki ta nifica cu si un comerciante cu, despues di e periodo pa coregi e situacion, no ta cumpli cu e prijsnan establece, por wordo sanciona cu un multa administrativo.

   E medida aki tin como meta principal promove cumplimiento di e reglanan y asina fortalece e proteccion legal di consumidor. E no ta un medida pa castiga comerciante, sino pa garantisa cu tur participante den mercado ta sigui mesun reglanan y cu consumidor por tin confianza cu prijsnan regula ta wordo respeta. Mayoria di supermercado ta cumpli cu e prijsnan di productonan den canasta basico pero asina mes tin algun cu no ta haci esaki y pa evita cu esunnan cu no ta cumpli sigui cu esaki door cu Gobierno no por actua, a prepara e cambio di ley pa haci esaki possible.

   Gobierno ta sigui cu nan compromiso na un mercado transparente, husto y confiabel. E introduccion di handhaving pa e canasta basico ta forma parti di un serie di maneho cu Gabinete APP-Futuro ta implementando pa modernisa e supervision economico y pone interes di e consumidor na prome luga.

Gobierno lo sigui informa comunidad tocante e implementacion di e medida nan aki y ta conta cu cooperacion di e sector comercial pa logra un sistema cu ta beneficia tanto consumidor como empresario, segun Minister Geoffrey Wever.