No ta edificio di DAO y DIMAS so pero tin mas edificio di gobierno cu tin beskem

Excel Figaroa, Presidente di e Sindicato TOPA:

ORANJESTAD (AAN)-- Encuanto e problemanan di salud cu algun trahador di DAO a presenta of tin ainda, Axcel Figaroa, presidente di Sindicato TOPA, den entrevista cu DIARIO a indica cu “algo mester a sosode eyden” pasobra tin trahadornan tin keho riba nan salud, manera problema di cuero, falta di rosea, kimamento di garganta.

   “Pues, tin diferente indicacion cu tin algo, pero enberdad ningun hende a haci nada. Aworaki nan a saca tur trahador di eynan, pero nos kier sa di DIMAS. Nos no a haya contesta di nan ainda, aunke tin informacion si cu nan a cuminza mobiliza. Nos ta pendiente un rato pa scucha kico nan ta bin cu ne”, Figaroa a señala.

   Señor Figaroa a subraya cu e edificio di DAO y DIMAS no ta e unico cu tin e  problema di beskem (‘schimmel’ na hulandes), pero tin mas, entre otro na edificio di KIA, y Ministerio Publico, y diferente departamento publico y esey ta importante.

   “Nos a pone enfasis den e ultimo reunion cu Minister. Nos kier cu e Comision wordo lanta bek,  y p’e bira un Comision permanente pa haci onderzoek na diferente departamento. Pues, enberdad e tin consecuencia.”

   “Nos ta persisti riba dje pa e Comision wordo lanta pa sigui cu e trabao cu nan tabata haciendo na bienestar di e trahadornan”, señor Axcel Figaroa, presidente di sindicato TOPA a remarca.