Prome Minister a reuni cu comunidad Chines pa fortalece participacion di comercio den “Dia Nacional pa Cuida Aruba”

ORANJESTAD (AAN): Den cuadro di e iniciativa “Dia Nacional pa Cuida Aruba”, Prome Minister Mike Eman a reuni cu representantenan di comunidad Chines

pa dialoga tocante e rol importante cu comercio por hunga den cuido di nos isla y tocante participacion di e comerciantenan den e iniciativa nacional. Durante e reunion, a resalta e importancia di participacion di comerciante, reconociendo cu hopi empresario ta forma parti di comunidad di Aruba y por contribui activamente na cuido di e entorno caminda nan ta biba, traha y opera.

William Ng, na nomber di The New China Club, a expresa e compromiso di comunidad Chines pa participa den “Dia Nacional pa Cuida Aruba”. El a subraya cu Aruba ta nos cas y cu cuida e espacio rond di nos ta un manera pa duna bek na e comunidad cu ta forma parti di nos bida diario. Segun Ng, Club Chines ta motiva famianan, paisanonan y negoshinan pa cuminsa cu accionnan di limpiesa rond di nan propio negoshi. Despues, e club lo organisa pa identifica luganan cu mester di mas atencion. Sr. William a indica cu comunidad Chines ta dispuesto pa duna e prome paso y ta invita mas comerciante na Aruba pa uni na e causa.

Participacion di comunidad Chines ta un ehempel di con sector priva por aporta na un esfuerso colectivo pa un Aruba mas limpi. Ora negoshi, organisacion y ciudadano uni forsa, nos por crea un cultura caminda duna bek na comunidad y cuida nos entorno ta bira parti di nos responsabilidad comparti.

“Dia Nacional pa Cuida Aruba”, cu lo tuma luga dia 25 di juli, ta un invitacion na tur ciudadano, negoshi y organisacion pa tuma accion y aporta na preservacion di e bunitesa di nos isla. Cu compromiso di cada sector, nos por sigui construi un Aruba mas limpi y mas bunita, cu nos tur por ta orguyoso di dje.