Corte a atende homber adicto haya cu plantacion di 145 mata di Marihuana

Tur cos a start ora un Airtag a detecta Brommer horta na su cas

ORANJESTAD (AAN): Tabata Diahuebs mainta cu e hombernan F.d.C. (22) y e homber A.L. (23) mester a presenta dilanti Hues pa e caso penal contra nan.

   Ta asina cu A.L. so a presenta. E acusacion cu Fiscal a presenta contra F.d C. ta cu riba 31 December 2025, e tabata den posesion di marihuana. E acusacion contra A.L. ta cu entre 1 Augustus 2025 y 31 December 2025, e tabatin un plantacion di marihuana.

   Ta asina cu A.L. so a presenta cu su abogado mr. Carlo.

   Plantacion di Marihuana: Hues a bisa cu tur cos a start ora Polis a haya denuncia di ladronicia di 2 brommer, y cu e doño tabatin un Airtag tracker riba e brommernan.  Esey ta yudabo localiza bo pertenencia, y asina a bin detecta cu e brommer lo ta scondi na Yucuri.

   Pesey Polis a bay busca na e cas na Yucuri. Polis a topa cu F.d C. kende a bisa cu e ta biba den di dos piso di e cas. El a duna permiso na Polis pa haci investigacion. Polis a mira e dos brommer para y a haci un investigacion na e cas.

   Ora cu nan a tira bista patras di cas, pa nan sorpresa a bin topa cu plantacion grandi di marihuana. Den e camber di F.d C. a haya un cantidad di marihuana. Relaciona cu e plantacion, Polis a detene A.L., kende ta doño di e matanan. En total a haya 145 mata di cual 35 mata cu cabez y 110 mata na un otro banda.

   Hues a puntra A.L. si e plantacion tabata pa bende marihuana.  A.L. a bisa Hues cu e tabatin e matanan pa propio consumo. El a bisa Hues cu e ta adicto na marihuana y tabata gasta hopi placa pa cumpra marihuana. Pesey el a dicidi di planta. Segun A.L., e no tabata biba eynan.

   Hues a bisa cu Polis a haya den e cas 60,5 gram marihuana y mas cu 300 gram di blachinan di marihuana seco. Segun A.L., e no tabata sa di e droga haya den e cas. El a bisa cu F.d C. tabata biba e parti ariba di e cas.

   Adicto kier rehabilita: Hues a bisa cu A.L. a keda sera 7 dia pa e caso y despues laga liber. El a mustra cu na 2024, A.L. a haya condena caba pa un caso di droga, caminda el a wordo condena na 83 dia di prizon y castigo condicional. Hues a bisa cu esaki ta nifica cu ainda A.L. tabata den tempo di prueba, ora el a wordo gara pa plantacion di marihuana.

   Segun A.L. na 2023 el a wordo condena y su tempo di prueba a pasa. Hues a mustra cu e decision di Corte tabata Januari 2024 y e tempo di prueba ta caba na Januari 2026. Hues a remarca cu ta bon cu A.L. ta corda cu e tin tempo di prueba pero no ta bon cu asina e tempo caba, ta bolbe bay haci algo malo. A.L. a bisa cu esey no tabata su intension. Hues a mustra cu A.L. a bisa cu e ta adicto na marihuana y ta desea di haya ayudo pa rehabilita.

   Hues a mustra cu F.d C. a keda sera 4 dia so. E tin un carchi castigo caminda tin un multa pa complice den un caso di droga.

   Fiscal a exigi castigo combina: Fiscal a bisa Hues, cu a haya den e camber di F.d C. 350 gram di marihuana. Patras di e cas a haya 145 mata di marihuana. Investigacion di laboratorio ta mustra cu e matanan ta contene THC, cu ta e droga. F.d C. a bisa cu e matanan ta di A.L. Fiscal a bisa cu ambos sospechoso a admiti. Fiscal ta haya cu ta legal proba cu F.d C. tabatin marihuana y cu A.L. tabatin plantacion di marihuana.

   Pa cu e castigo, Fiscal a bisa cu plantacion di marihuana ta un asunto serio. Fiscal a bisa cu e no ta considera F.d C. y A.L. como “fist offender”. Fiscal ta haya cu A.L. a haci delito den su tempo di prueba y no a haci e trabao pa comunidad cu e mester a haci. Fiscal a remarca cu ta parce cu e castigo no a yuda trece cambio den A.L. Fiscal a exigi pa F.d C. 1000 Florin di boet of 20 dia sera. Pa A.L. el a exigi 90 dia di prizon di cual 30 dia ta condicional cu un tempo di prueba di 3 aña.

   Abogado: mr. Carlo a bisa Hues cu A.L. a admiti. El a pidi Hues pa tene cuenta cu e situacion di A.L. E abogado ta haya cu A.L. a cuminsa cana e caminda positivo. E ta trahando. Na opinion di abogado, e exigencia di Fiscal ta encera cu A.L. lo mester bay sera algo mas di 1 luna. E abogado ta haya cu esaki lo no yuda A.L. El a pidi Hues pa castiga A.L. na un castigo combina di tal forma cu A.L. por sigui traha.

   Sentencia: Hues a sera tratamento di e caso y a dicta sentencia di biaha. Hues ta haya cu ambos ta culpabel y ambos a admiti di nan delito. Pa cu e castigo, Hues a bisa cu e exigencia di Fiscal pa F.d C. ta na su lugar y a confirma esaki. Pa loke ta A.L., Hues ta haya malo cu A.L. den su tempo di prueba ta bay planta marihuana.

   Di otro banda Hues ta haya cu A.L. ta sincero y a bisa cu e ta adicto. Hues ta haya cu por duna A.L. un chens. El a condena A.L. na 90 dia di prizon di cual 83 dia ta condicional cu 3 aña di prueba. Hues a hala A.L. su atencion, esta pa e compronde e seriedad cu el a dun’e un chens pa A.L. busca manera pa rehabilita.