Consulado di Venezuela ta den contacto directo cu Crisis Team di Gobierno di Aruba

Consul Amabel Lugo:

ORANJESTAD (AAN) Señora Amabel Lugo Irizarry, Consul General di Republica Bolivariana di Venezuela na Aruba, a declara den entrevista cu Matutino DIARIO, cu e consulado tin contacto directo cu e Crisis Team di Gobierno di Aruba, y ambos ta hiba y monitorea tur e actividadnan cu ta wordo produci na Venezuela, entorno e destruccion causa den e pais door di e temblor.

   “Na prome lugar e dia siguiente, Minister Presidente Eman a tuma contacto cu mi persona, pa duna e apoyo y solidaridad di e pueblo di Aruba y su gobierno, pa locual ta sosodiendo na Venezuela, y den su rueda di prensa el a establece cu si ta necesario habri e fronteranan di manera humanitario, pa hiba algun ayudo, e lo haci’e. Den e particular aki, mi ta reitera, nos ta den un proceso di buskeda y rescate, unda primordial ta e ekipo tecnico y specializa pa e tipo di desasternan aki, y posteriormente, nos tur: venezolano, Arubiano, otro stranheronan, nos sa di e solidaridad unda nos tur kier yuda, y esey ta importante.”

  “Nos semper, den e dificultadnan ta cu e pueblonan ta crece, y nos ta balor’e, ta gradici’e. Nos ta compronde cu tur hende kier yuda, y te cu ayera nos solamente a ricibi e tata di un mucha homber cu ta desapareci na La Guaira, y nos no a haya rapport di otro famianan cu tin un familiar desapareci of cu ta den un condicion vulnerable. Nos no a ricibi aki den e Consulado e tipo di informacion ey, sinembargo nos sa cu tin hopi Venezolano y stranhero cu kier haci un aporte. Ami, particularmente, ta sugeri pa nan tuma contacto cu e telefonnan y emailnan cu Gobierno di Aruba a pone disponibel pa canaliza un solo ayudo, y cu e ayudo aki bay door di e canalnan regular, y cu e ayudo aki yega realmente na kendenan ta coresponde”, Consul Amabel Lugo a señala.