‘Na momento cu Ley HOFA drenta na vigor, nos ta pasa pa ultimo palabra’

Parlamentario Evelyn Wever-Croes:

ORANJESTAD (AAN)-- E Parlamentario y lider di Fraccion di MEP, Evelyn Wever-Croes, a comenta cu e ta sinti un decepcion hopi grandi, pasobra el a drenta den politica pa haci cosnan grandi pa Aruba, y e ta traha tur dia pa logra mehora e calidad di bida di nos hendenan.

   Esaki el a bisa den e contexto di e reunion informativo tocante Rijkswet HOFA, cu a wordo organiza pa Partido Patriotico Arubano PPA.

   “Na momento cu e Ley di Reino HOFA drenta na vigor, nos ta pasa e ultimo palabra, nos finanzas den man di Hulanda, y aki na Aruba nos no por tuma un decision importante mas. Mi ta duna un ehemplo e recherchenan cu a walk out, pasobra cu no tin suficiente trahado, nos no por tuma e decision ey mas pasobra e decision ta wordo ta wordo tuma na Hulanda. Ora cu prijs di gasoline ta subi anto bo kier pa gobierno absorbe prijs y duna un subsidio, bo no por hacie mas pasobra e ta depende di Hulanda. Asina tin tanto decision cu bo kier tuma pa mehora e calidad di bida di cada ciudadano aki na Aruba, cu bo no por tuma mas pasobra ta na Hulanda e palabra final ta tuma lugar. Esaki ta pa mi e preocupacion principal”.  Parlamentario y lider di fraccion di MEP a remarca.