Otro morto den trafico: Aruba ta registra 7 victima fatal na 2026
ORANJESTAD (AAN): Diadomingo, 14 di juni 2026, rond di 5:40 di mainta, Central di Polis a ricibi un notificacion tocante un accidente di trafico na Sabana Liber, unda un brommer tabata envolvi.
Mesora, patruya di polis y ambulance a wordo despacha pa e sitio. Na yegada di e prome unidadnan, nan a topa cu un homber gravemente herida.
Segun informacion recopila na e sitio, ta probabel cu e motociclista a perde control di su brommer y a dal contra e acera.
Paramediconan a brinda e victima e asistencia medico necesario na e sitio, despues di cual nan a logra stabilisa su condicion y transport'e cu maxima urgencia pa hospital. E homber a keda interna den Unidad di Cuido Intensivo (ICU).
Specialistanan di Trafico y personal di Polis Tecnico (BFTO) a presenta na e escena pa realiza e investigacion corespondiente. Tambe, Departamento di Slachtofferhulp a wordo poni na altura pa brinda apoyo na e famia di e victima.
Diamars atardi, Central di Polis a wordo informa pa personal medico cu e condicion di e victima a deteriora gravemente. Pa 1:17 di merdia, dokter a constata e morto di Johan Fernando Vásquez López, naci na Colombia dia 10 di maart 1993, di 33 aña di edad.
E caso ta ainda bou investigacion pa determina cu exactitud con e accidente a tuma lugar.
Cu e fayecimento aki, Johan Fernando Vásquez López ta bira e di 7 victima fatal den trafico na Aruba durante aña 2026.
DIARIO y Cuerpo Policial Aruba ta expresa su mas sincero y profundo condolencia na famia y sernan kier di e fayecido.
Related News
Reparatietoeslag y uitkering pa personanan cu limitacion lo conoce un aumento
Hof mester declara Otmar Oduber liber di e persecusion politico cu denuncianan falso
Pensionadonan cu ta haya tanto pensioen di APFA como di APC ta desea pa nan traha hunto
