Awe tin reunion cu Mando Policial y te ayera ainda no tabata conoci orario ni luga

Lito Lacle, Presidente di SPA:

ORANJESTAD (AAN)-- Lito Lacle, Presidente di Sindicato SPA, a actualiza e informacion tocante e crisis di falta di personal cu Departamento di Recherche (DAR) ta pasando aden, sin cu tin solucion ainda.

Den entrevista cu Matutino DIARIO, Lacle a retrocede na Diadomingo siman pasa, na momento cu su coleganan di DAR a haya yamada bisando cu su diamars siguiente nan lo a spera nan na e warda na Wayaca unda cu ta bay  papia riba solucionnan pa nan edadnan.

“E coleganan di DAR tambe a invita Korpschef, ken no a presenta na e luga. Lito no tabata sa di e reunion ey, y mi ta forma di rectifica e eror aki.

Ora cu e colega Hefe di Recherche a yega y bisa nan cu e no tin e solucion y cu e ta subi avion p’e bay. Y eynan nos ta para aworaki, despues cu Diahuebs tabata tin un rueda di prensa di Korpschef”, Lacle a indica.

Dialuna nan a para pafo di e departamento sin cu e situacion a cambia. Presidente di SPA a sigui declara cu aworaki e coleganan di DAR ta urgi pa papia cu Minister di Husticia pasobra nan ta ripara cu Mando Policial no ta duna nan e oido cu nan mester.

Lito Lacle a indica cu ta bon cu e ta traha cu carta cu Mando Policial, y den e ultimo carta el a acentua cu Mando Policial tabatin cuater carta pa contesta.

“Te cu Diabierna cu a pasa el a contesta e cuater cartanan ey, y awe, diamars 16, nos tin un reunion cu Mando Policial, y te ainda nos no a haya orario ni localidad, y esey ta e situacion”,  Lito Lacle a señala.

El a splica cu KPA tin hopi reto, ademas di e asunto di Recherche, entre otro, a kita cierto derechonan di e trahadornan unda tin cu ta trahando dos warda tras di otro y esaki ta sosodiendo desde 2019, segun Presidente di SPA, Lito Lacle.