Comunidad ta invita pa celebra un aña di existencia di “Aula di Lama”

Ing. Jareth Vermeulen di Sustainability Alliance:

ORANJESTAD (AAN)-- Ing. Jareth Vermeulen, di Sustainability Alliance Aruba, den entrevista cu Matutino DIARIO, a haci un invitacion na pueblo di Aruba, pa bin celebra awe for di 6’or di atardi, un aña di existencia di “Aula di Lama”.

“Mi ta cuminza pa splica cu ora nos a habri ‘Aula di Lama’, na inicio e tabata un laboratorio di coral, pero manera nos ripara cu na Aruba ya caba tabata tin proyectonan asina andando, nos a bay wak kico nos por haci pa yuda Aruba mas, esey ta educacion”, Vermeulen a bisa cu tempo el a bay scol na Aruba, nan tabata siña tocante winter, coneu y algun sorto di animal grandi, pero nunca nan a siña di nos shoco, lagardishi, cascabel, y te eynan unda Metabolic Foundation  a yuda, fundamentalmente, pa crea un area, cu ta den hotel si, pero cu ta pa pueblo di Aruba en general y su educadornan y studiantenan.

“Aña pasa, durante e Dia Mundial di Oceanonan, no a haci un evento unda diferente NGO’s, Fundacion, Stichting, a bin haci un presentacion di nan organizacion, cu tabata super bon, y a habri e Aula, unda tabata tin diferente peticion, y ata nos sinta akinan un aña despues, unda Christie a habri un beca, cu ta e prome cu nos habri pa investigadornan, pa studia diferente topico di medio ambiente y naturaleza na Aruba. Nos ta hopi contento y asina nos ta sigui tambe cu e proyecto ‘Man and the Biosphere’ (MAB) cu a cuminza akinan, y a wordo lanza aña pasa den Aula di Lama, y ayera nos a haya e noticia cu esaki a wordo aproba ayera door di UNESCO”, Jareth Vermeulen a relata.