MEP ta pidi reunion publico cu Prome Minister tocante su anuncio di retiro

ORANJESTAD (AAN):  Fraccion di Movimiento Electoral di Pueblo (MEP) a entrega un peticion urgente na Presidente di Parlamento pa

yama un reunion publico cu Minister-President Mike Eman. E peticion ta sigui e declaracion publico cu Minister-President a haci dia 15 di juni 2026, anunciando cu e lo laga su funcion como Minister-President entrante 1 di januari 2027. 

Segun MEP, e anuncio aki ta crea preocupacion serio tocante stabilidad gubernamental, continuidad di gobernacion y liderazgo politico den un momento crucial pa Aruba, caminda decisionnan importante ta pendiente, incluyendo e discusionnan riba HOFA y otro asuntonan nacional di gran importancia. 

MEP ta considera cu Minister-President tin e obligacion di duna splicacion publico na Parlamento y na pueblo di Aruba tocante entre otro: 

• ⁠ ⁠E proceduranan constitucional y politico cu lo wordo sigui pa scoge y nombra un sucesor;
• ⁠ ⁠E criterianan cu lo garantisa un transicion ordena y sin incertidumbre;
• ⁠ ⁠E impacto di e anuncio riba stabilidad di gobierno actual;
• ⁠ ⁠E medidanan cu lo wordo tuma pa garantisa continuidad y stabilidad gubernamental durante e periodo di transicion;
• ⁠ ⁠E consecuencianan pa negociacionnan, proceso di politica publico y obligacionnan internacional di Aruba. 

“Un Minister-President no ta ocupa un funcion den nomber di un partido politico solamente. E ta ocupa e cargo mas halto den gobernacion den nomber di henter pueblo di Aruba. Un anuncio di e magnitud aki ta exigi total transparencia y dunamento di cuenta na Parlamento y na comunidad,” segun e fraccion. 

MEP ta pidi pa e reunion publico aki wordo agenda cu prioridad pa Aruba por ricibi e claridad cu e situacion actual ta exigi..