E maneho nobo di Minister di Husticia y Integracion a yuda DIMAS hopi

Tisa LaSorte, CEO di AHATA:

• Pero ainda no a soluciona e problema completo 

ORANJESTAD (AAN): CEO di AHATA, señora Tisa LaSorte, a declara den entrevista cu DIARIO, cu e maneho nobo cu tabatin di Minister di Husticia y Integracion, a yuda DIMAS hopi. 

   “DIMAS a haci su trabao tambe den yuda haya e permisonan di e personanan cu tabata indocumenta na Aruba, pero cu por a haya un permiso di trabao. Den esey, mi por bisa cu tin miles di persona cu a haya un permiso cu awo legalmente ta paga impuesto y traha cu companianan cu solamente ta traha cu empleado cu status legal. Esey a yuda nan hopi; claro e buraco tey ainda, tin hopi trabao habri ainda cu falta hende, pero e tabata un ayudo pa tin e maneho nobo ey”, LaSorte a señala.

   CEO di AHATA a agrega cu DIMAS a haci su trabao, pero loke ta pasa ta  cu ainda tin un caminda cu tin problema, cu ora cu nan haya un permiso di trabao nan no por cuminza traha te ora cu nan ta registra na Censo.

“Anto Censo tin un problema cu, aparentemente, nan falta capacidad, cu no por haya e fechanan di cita suficientemente lihe, pa hendenan por registra na Censo, y e ora ey por cuminza traha. Nan ainda tin un retraso, por lo menos e maneho a yuda pero ainda no a soluciona e problema completo”, Tisa LaSorte a señala.

   El a agrega cu e dialogo ta sigui, y AHATA tin un bon relacion y reunion regularmente cu DIMAS, y cu Minister di Husticia y Integracion, nos ta sigui cu e combersacionnan y en busca di solucion”, Tisa LaSorte a indica.

   El a menciona cu e trabaonan pa cual ta mas dificil pa haya hende ta housekeeping y Koki.

   “Tambe por ripara cu den e sector hotelero, e situacion a cambia un tiki. Tin menos empleado awo pa cada camber, tin menos ocupacion na hotelnan awo, mas tanto nan ta  purba di crece den balor. Mesun strategia cu nos ta recomenda pa Aruba en general, unda bo kier crece bo economia den balor envez di cantidad di persona, na hotelnan esey ta tuma lugar”, Tisa LaSorte a subraya.

Esaki ta un strategia unda ta hisa e prijs, pero mester duna un bon servicio, si. Ainda mester di hende bon capacita, bon entrena, y suficiente hende pa duna e servicio pasobra bo ta cobra mas, e cliente por exigi mas. “Y esey ta e problema cu nos tin, cu ainda no tin suficiente hende pa enberdad duna e servicio optimal cu nos lo kier duna”, CEO di AHATA a señala.