Ta rekeri responsabilidad y disciplina pa cumpli cu pago di impuesto di vehiculo di motor na tempo

Señora Meverly Romano di DIMP:

* DIMP ta ofrece sistema di pago parcial 

ORANJESTAD (AAN): Tur vehiculo di motor tin e responsabilidad pa cumpli cu pago di impuesto di number. Cada 31 di januari y cada 30 di juni di aña, ta e deadlinenan pa paga impuesto riba number di vehiculo di motor. Si usuarionan no paga esaki pa e fechanan menciona, e boet di 50 % ta bin na vigor e siguiente dia. Señora Meverly Romano di Departamento di Impuesto (DIMP) a remarca cu tin ciudadanonan cu no ta worry pa cumpli cu e pago, pero tin algun cu pa motibo di situacionnan, tin dificultad pa cumpli.

DIMP ta ofrece e sistema di pago parcial. E departamento ta habri e posibilidad pa paga desde september pa e aña siguiente. Ciudadanonan por cuminsa paga un suma (Awg.50,-) pa luna pa e prome mita di aña te ora e cubri e suma total prome cu deadline na fin di januari. Y despues e por sigui paga mescos pa e di dos mita di aña prome cu e deadline na fin di juni.

“Esaki ta rekeri conscientisacion y disciplina pa ciudadanonan por cumpli cu nan pago di impuesto di vehiculo di motor na tempo”, señora Romano a expresa.

El a menciona cu e cantidad di 13.909 pa incumplimento ta un cantidad toch halto. Esakinan ta e cantidad di vehiculo di motor cu ta coriendo riba nos careteranan sin nan impuesto paga. Di e grupo aki, tin 795 motociclista cu no a paga nan number di MFA pa aña 2026. Y tin 11.679 di plachinan A cu no ta paga.

DIMP ta recorda tur ciudadano cu no a paga nan impuesto di vehiculo di motor ainda pa e di dos mita di aña, pa tene cuenta cu e deadline ta dia 30 di juni. Y si no paga pa e fecha aki, dia 1 di july e boet di 50% automaticamente ta drenta den sistema riba nomber di esnan cu no a cumpli cu e pago.