Dialogo no ta suficiente pa trece bienestar pa nos paisnan

Parlamentario Shailiny Tromp-Lee na IPKO:

ORANJESTAD (AAN): Durante e reunionnan intensivo di IPKO (Interparlementair Koninkrijksoverleg) cu a tuma lugar na Hulanda, un di e partinan mas crucial tabata e sesionnan di trabao den grupo unda a debati abiertamente riba e cooperacion denter di Reino.

Parlamentario Shailiny Tromp-Lee a hiba un posicion firme, enfatisando cu dialogo so no ta suficiente pa avanse.

E sesionnan aki, cu a wordo teni tras di porta cera pa garantisa un ambiente di confiansa y sinceridad, a duna espacio na e parlamentarionan di Aruba, Corsou, Sint Maarten y Hulanda pa confronta e realidad di nan relacionnan.

A hiba dialogo rond di preguntanan manera: Con e paisnan ta mira otro? Con por evalua e confiansa mutuo? Y kico realmente falta pa por bini cu un mihor formacion di respet y un bista habri pa e necesidadnan di cada un?

For di dialogo pa accion

Pa Parlamentario Tromp-Lee, e combersacionnan aki den diferente grupo di trabou mester tin un meta hopi mas halto cu simplemente un intercambio di opinion. “E dialogonan aki tin balor, pero riba nan mes no ta basta. Mi inbreng tabata masha cla y directo: nos mester percura pa den futuro e dialogonan aki culmina den palabracionnan concreto pa traha riba solucionnan real y beneficionan tangibel pa nos paisnan,” Tromp-Lee a declara.

E parlamentario a splica cu cooperacion denter di Reino por funciona solamente si tin determinacion y decisionnan fiho cu ta traduci den beneficio directo pa nos hendenan. Di e forma aki, IPKO por fungi como un plataforma berdaderamente productivo y eficiente, unda e reaunionnan ta duna resultado.

Tromp-Lee ta indica cu e session a bay hopi bon y sigur e ta haya hopi positivo cu a amplia e cantidad di tempo cu ta pone riba schedule pa nan. Antes e tempo tabata demasiado limita y awor a pone 2 ora esaki. Sigur un cambio pa mihor. 

Un cooperacion structural

E meta final di e sesionnan aki mester conduci cu ta keda stipula kico e parlamentarionan tin mester di otro pa por traha hunto na un mihor manera, cu mas respet mutuo y un atencion real pa e retonan cu cada pais ta enfrenta.

“Solamente cu determinacion y accionnan concreto nos por fortifica un cooperacion den Reino cu berdad ta trece bienestar pa nos pais,” Tromp-Lee a conclui.