Solucion pa falta di personal mester ta estructural y sostenibel

Segun Alto Comisario di Polis Ramon Arnhem:

* E ta un problema serio cu ta existi desde hopi aña caba 

ORANJESTAD (AAN): Diahuebs merdia, Alto Comisario Ramon Arnhem a convoca un conferencia di prensa na Centro di Husticia na Macuarima pa duna su declaracion despues cu recherchenan a para trabou pa aproximadamente dos ora pa manifesta nan preocupacion tocante e continuo falta di personal.           

E preocupacionnan expresa door di Sindicato di Polis, SPA y e personal di Districtsrecherche ta totalmente hustifica, segun Alto Comisario di Polis, cu a reconoce cu e departamento aki ta enfrentando un falta di personal serio desde hopi aña. Sinembargo, segun señor Arnhem, e solucion no por limita su mes na un solo departamento. 

Segun e, apesar di e condicionnan dificil, e personal di Districtsrecherche ta sigui entrega trabounan di calidad halto y ta merece gran respet pa nan dedicacion. E Korps Management Team (KMT) ta completamente di acuerdo cu e preocupacionnan expresa door di e sindicato y e personal investigativo. 

Alto Comisario a expresa cu ta lamentabel cu e situacion a yega na un punto unda empleadonan a sinti nan mes obliga pa protesta. No obstante, el a indica cu protesta ta parti di un sistema democratico y por contribui na identifica problema y preocupacionnan cu ta existi. 

El a enfatisa cu e obhetivo di tur ta mescos: garantisa siguridad den nos comunidad y cuida e bienestar di e personal. 

Tocante e peticion pa reforsa Districtsrecherche, Alto Comisario a splica cu no ta semper posibel pa simplemente transferi personal di otro departamentonan. Segun e, varios unidad dentro di Cuerpo Policial di Aruba tambe ta enfrenta escases di personal y mester sigui atende investigacionnan y otro tareanan esencial. El a confirma cu durante e siman aki mes a tuma medida pa fortalece Districtsrecherche y cu esaki a wordo comunica cu e personal concerni. 

Tambe, segun e, e problema di falta di personal no ta limita su mes na polis pero ta afecta practicamente henter cadena di husticia, incluyendo Ministerio Publico, KIA y KPA. Como resultado, Ministerio Publico a indica cu tin denuncia cu no ta haya seguimiento debi na e limitacionnan existente.  

Segun Arnhem, e problema actual ta resultado di añanan sin suficiente entrada di personal nobo. El a señala cu durante ocho aña no tawata tin klasnan nobo na e academia di polis, mientras cu hopi agente a baha cu pension of a laga servicio. Desde cu el a asumi e cargo, tawatin dos klas maximo pa aña. 

Actualmente, KPA ta opera cu mas di 30% di falta di personal. Sin embargo, segun e Alto Comisario, e cifranan actual ta basa riba data di 2011 y no ta refleha e realidad di awe, considerando cu tanto e poblacion como e complehidad di trabou policial a crece considerablemente. 

Pa atende e desafionan, KPA ta busca solucionnan innovador mediante automatisacion, inversion den tecnologia y redistribucion strategico di personal. No obstante, e Alto Comisario ta enfatisa cu e solucion real mester ta estructural y sostenibel, incluyendo inversion continuo den entrenamento y incorporacion di personal nobo durante e añanan benidero. 

Finalmente, el a reafirma su disponibilidad pa mantene dialogo cu sindicato y otro actornan relevante. “Mi ta sigui busca conexion y cooperacion. Solamente trahando huntu nos por yega na solucionnan duradero pa e desafionan cu nos organisacion ta enfrentando,” el a conclui.