Departamento di Recherche ta den crisis

Lito Lacle, Presidente di Sindicato di Polis:

*A bati alarma di tur manera, pero nan no ta hayando oido 

ORANJESTAD (AAN)-- Señor Lito Lacle, Presidente di Sindicato di Polis (SPA), den un entrevista cu Matutino DIARIO, a vocifera cu DAR ta den crisis. Diaranson, su coleganan di DAR (Departamento di Recherche) a yam’e bis’e cu nan no por mas.

“Un luna pasa, por ehemplo, Minister di Husticia a duna opdracht na Mando Policial pa pone mas hende na DAR, pa nan por duna servicio na pueblo di Aruba, y Ministerio Publico a manda en total tres carta pa nos Mando Policial, di cual e prome dos cartanan no a haya contesta, y e di tres a haya contesta, pero sin solucion.

Fin di siman a pasa, y Mando Policial a scucha cu probablemente Dialuna DAR lo ‘walk out’. Mesora Diadomingo coleganan di DAR a dicidi pa no ‘walk out’ pero bay sinta mesa y ban busca solucion. Na mesun reunion ey na Wayaca, Altocomisario a wordo invita, pero e no a bin. Esey pa cuminza!

Pa di dos, coleganan di DAR a sinta na mesa cu hefe di Recherche caminda el a bisa nan cu e no sa unda tin problema, y no tin solucion pa e problema, y despues el a coi su maleta subi avion bay Curacao. Esey tabata e solucion y eynan nos ta para awe”, Presidente di SPA Lito Lacle a señala.

Lacle a sigui bisa cu tin dos distrito cu ta Noord y San Nicolas cu ta practicamente sin recherche, nan a bati alarma di tur manera, pero nan no ta hayando oido, locual ta hopi importante aworaki unda DAR ta completamente plat awo.

Lito Lacle a menciona cu mas of menos tres aña pasa vacature a wordo habri pa tuma siete recherche den servicio, un so nan a haya y despues nunca mas a haya un beschikking den e DARnan y esey ta un di e problemanan mas grandi cu tin.