Veronica Camara, di Bloedbank Aruba:
E grupo di sanger cu mas demanda tin ta “O Negativo”
ORANJESTAD (AAN)-- Diadomingo, dia 14 di Juni ta Dia Mundial di Donante di Sanger, y den e contexto aki, Veronica Camara di Bloedbank Aruba, den entrevista cu Matutino DIARIO, di antemano a felicita y gradici tur donante actual, di nos comunidad, cu awo y tur e añanan venidero ta bay ta donando sanger na Banco di Sanger.
“Actualmente nos tin 1300 donante, pero nos meta ta pa pasa e 3000 donantenan. Pues, nos falta un poco mas pa yega na e cantidad aki”, Veronica a subraya.
El a agrega cu tur persona cu kier bira donante, por acerca Bloedbank, y por aplica via: Bloedbankaruba.aw, y nan ta mas cu bonbini pa yuda comunidad.
Esaki a un gesto super bunita y haci un bon causa, Veronica a expresa.
“Nos ta den buskeda di mas donante y nos mester di boso”, el a reitera.
E grandeza di ta un donante ta yuda un pashent cu tin mester di bo, y esaki ta unico di hende, cu solamente di bo curpa bo ta haya sanger pa duna, y ta unico ingrediente cu por comparti, boluntariamente, cu un persona cu tin mester di dje, di un manera critico, sea via un operacion cu e mester, of pasobra e ta un pashent oncologico.
“Pues, tin hopi manera cu un persona por yega na sanger, pero e di mas bunita ta cu bo ta dune algo unico, na un persona cu mester di dje”, Veronica a reitera.
El a splica cu e trending na Bloedbank cada donante por bin cada tres of cuater luna, nan por bin tres biaha pa aña. E grupo di sanger cu mas demanda tin ta “O Negativo”, cu e banco tin masha limita, y si mas donante di e tipo aki ta yuda, lo baha e presion riba e poconan cu tin actualmente.
Tin hende cu no sa ki tipo di sanger tin, y esaki, Veronica ta splica, por pidi docter di cas pa manda un test di sanger y eynan e persona ta haya sa ki tipo e tin. “Pero eingenlijk, ora nan bin cerca nos, pa bira donante, nos ta haci un test di sanger pa sa ki tipo di sanger nan tin. Esaki ta un estandard di nos, cu nos ta test nan”, Veronica Camara a indica.
