Evelyn Wever-Croes a haya audiencia cu Gobernador

Cual e ta considera un hopi bon reunion:

ORANJESTAD (AAN) Parlamentario Evelyn Wever-Croes, lider di Fraccion di Partido Movimento Electoral di Pueblo, recientemente tabata tin audiencia cu Gobernador Alfonso Boekhoudt.

   Wever-Croes a splica cu e lidernan di fraccion, riba un base regular, ta wordo invita pa hiba audiencia y durante esaki ta wordo trata diferente tema, pero logicamente no por elabora riba e temanan den publico.

“Mi mester bisa cu e reunion tabata un bon reunion. Pa nos, di fraccion di MEP, manera nos a bin ta publicando den varios ocasion, nos ta manda corespondencia cu Gobernador, por ehemplo, ora Presidente di Parlamento no ta yama reunion di Parlamento, nos ta pidi Gobernador pa e intermedia y papia cu Presidente di Parlamento ken ta indica cu e ta haya e señalnan ey di Gobernador, y e ta purbando di yama e reunionnan cu nos pa tanto tempo ta pidiendo, pero ya, Gobierno no kier bin”, Parlamentario Wever- Croes a bisa.

   El a agrega cu riba e jet priva di minister Gerlien Croes tambe, fraccion di MEP a manda hopi corespondencia, y e consehonan tambe pa Gobernador, pasobra Gobernador tin un trabao grandi pa haci den cuida nos Constitucion, cuida loke ta e principio di e fundeshi democratico di nos pais, y locual cu minister Gerlien Croes ta haciendo, di no contesta y hasta di gaña, ta kibra esaki.

   “Asina tin varios topico tambe cu ta importante pa intercambia cu Gobernador, p’asina nos informa tambe cu kico tur nos ta bezig cu ne, como fraccion di MEP. Nos por bisa cu e tabata un bon reunion, manera semper, den un ambiente hopi habri, den cual e informacion ta wordo duna.

   “Mi ta gradici Gobernador e oportunidad aki, pero principalmente pasobra mi tin tur fe y confianza cu e ta esun cu ta para pa mantene e fundeshi democratico di nos Constitucion, y pa pone tur esnan cu mester cumpli tambe cu loke ta e debernan cu nos Constitucion ta stipula”, Lider di Fraccion di MEP, Evelyn Wever-Croes a expresa, y a añadi cu lamentablemente un Gobernador no tin e poder riba un Minister Presidente pa bis’e kico e mester haci.

   “E no tin e poder riba un minister manera Gerlein Croes pa bis’e kico e mester haci, pero si espacio den e autoridad cu e tin, pa percura pa loke ta trata e debernan constitucional di nos minister y Presidente di Parlamento, wordo cumpli cu ne”, Lider di MEP    , Evelyn Wever-Croes a conclui.