Acusado R. Wever a traha carta di hala tereno aden

Abogado mr. Wever ta haya cu su cliente no ta culpabel di nada

• Segun instruccion di Oduber y director di DIP
• E tempo aya no a mira nada malo den haci cambio 

ORANJESTAD (AAN): Den caso Flamingo den apelacion, abogado mr. Odor a bisa Hof, cu su cliente R. Wever tabata coordinador di e team encarga cu dunamento di tereno y tabata traha bou orden di ex minster Otmar Oduber.

   E abogado a mustra cu R. Wever a wordo condena pa malversacion y falsificacion di carta. E abogado a bisa Hof cu Wever tabata traha riba instruccion di Oduber. E abogado a mustra cu Wever no a falsifica carta y no a haya beneficio di esaki.

   Wever a cumpli cu instruccion di Oduber: Na opinion di mr. Oduber, Wever a haci tur cos a base di orden di Oduber. E no por nenga instruccion di Oduber sino lo sufri consecuencia di no a cumpli cu orden di ex minister.

   E abogado a mustra cu Wever a haya instruccion di Oduber pa haci cambio den e double booking di tereno na Malmok. Wever a cumpli cu e instruccion, caminda a traha e carta pa G. indicando cu e no ta haya e tereno. E abogado a sigui bisa cu e cambio no a causa consecuencia pa Aruba.

   E abogado a remarca, cu si e director di DIP e tempo ey no a mira nada malo den haci cambio, por conclui cu Wever a haci e trabao manera a wordo pidi. E abogado a bisa Hof cu Wever no tabata sa cu e tabata haci algo malo. E abogado a bisa cu no tabata Wever su intension di haci malo. Ta ariba indicacion di Oduber y e director di DIP, Wever a haci cambio den carta pa G.

   Mustra sentencia caso Avestruz: mr. Odor a presenta na Hof e sentencia den caso Avestruz, caminda Ministerio Publico a persigui F. Abath di ta envolvi den dunamento di terenonan, El a musta cu e abogado di F.Abath y Abath mes a splica den Corte cu Abath tabata considera e cartanan cu e tabata haya di ex minister Sevinger, como instruccion y como tal a cumpli cu esakinan debidamente.

   Ta asina cu Hues di Corte den Promer Instancia a declara Abath liber di tur acusacion. Mr. Odor a bisa Hof cu por considera e situacion di su cliente Wever e mesun cos cu esun di Abath. E abogado ta haya cu Wever mester wordo declara liber pasobra e tabata cumpli cu instruccion cu el a haya di ex minister Oduber y di e hefe di DIP.