Luenne Gomez-Pieters di DIMP
ORANJESTAD (AAN)-- Señora Luenne Gomez-Pieters, director di Departamento di Impuesto, a sigui splica den conferencia relaciona cu e lanzamento “BO impuesto” (BOi) su portal digital, cu conhuntamente con DIMP su ekipo di comunicacion, nan a saca un flyer cu Servicio Postal lo bay distribui na cada cas di nos ciudadanonan, cual lo ta den cuater idioma y lo guia e contribuyente, individualmente, con e mester aplica pa su mesun account di “Bo Impuesto Portal”.
“E ta hopi facil y e ta guia e cliente stap pa stap p’asina ey e tin acceso na e Portal Bo Impuesto, y na e servicionan digital cu nos a caba di menciona.
Comerciantenan cu tin acceso na nos portal, no mester registra nan compania, pasobra nan por cuminza mira desde awe e estado di cuenta di nan compania, nan por cera un areglo di pago pa nan empresa, y nan por mira e pagonan haci e cinco añanan atras”, señora Gomez-Pieters a reitera.
El a agrega cu si e comerciante kier registra su mes como usuario di BOi e por haci esaki cu e mesun usering cu e tin pa su compania of habri un account specifico pa su persona individual, como contribuyente individual den e portal di BOi.
“Nos ta invita pueblo henter pa bishita nos website impuesto.aw, na unda por click pa drenta e pagina inicial di BOi, y lo sigui e proceso pa haya acceso na otro servicionan menciona”, director di DIMP, señora Luenne Gomez-Pieters a relata.
