AZV no tey pa inyeccion estetico (Botox) y pa baha peso mas lihe (Ozempic)

Relacionista publico Solange Tchong di AZV:

ORANJESTAD (AAN):  E rol di AZV legalmente ta e seguro medico pa cubri tratamento medico pa aseguradonan pa malesanan cu inesperadamente ta yega na porta di cualkier ciudadano. Esakinan ta malesanan cu niun ciudadano ta busca pero ta confronta su mes cu esaki.

   Relacionista Publico di AZV, señora Solange Tchong den entrevista recien cu DIARIO a duna di conoce cu AZV ta na haltura di hopi clinica di afo, como tambe di Aruba cu ta ofreciendo diferente servicio, entre otro inyeccion estetico (botox) y pa baha peso mas lihe (Ozempic).

   Esaki, el a enfatisa, ta un situacion hopi preocupante y ta alerta pueblo pa tuma nota di recomendacionnan cu AZV, DVG y Inspeccion di Salud ta duna. Ta hopi importante pa verifica of sa si di berdad e inyeccionnan cu bo ta haya ta verificabel y ta bin di un persona autorisa y competente pa duna esaki. 

   Señora Tchong a remarca cu un gran mayoria di e productonan y servicionan aki cu ta wordo ofreci, ta bin for di mercadonan ilegal. Tin un grupo grandi cu ta biendiendo e productonan of inyeccionnan eyfo procedente di mercado ilegal y ta duna inyeccionnan siendo nan no ta autorisa ni competente pa haci esaki. Ciudadanonan no sa kico ta tuma den curpa y no tin garantia compara si a cumpra e producto na un botica local of a bay via un dunado di cuido na Aruba cu ta registra den Arubig y tin su documentonan na ordo.

   A pesar cu AZV no tey pa tratamentonan cosmetico of pa baha peso mas lihe, e complicacionnan di esakinan ta cay pa AZV. Si un persona bira malo despues di tuma inyeccionnan for di clinicanan ilegal y for di personanan no autorisa y competente, e consecuencianan lo cay bou di AZV y por lo tanto, nos tur ta carg’e.

   “E personanan aki, si nan bira malo, sea nan ta acudi na Sala di Emergencia of docter di cas of na cualkier dunado di cuido cu ta cay bou di AZV. Na final di dia, si nos no tuma responsabilidad, nos lo haya nos comfronta cu complicacionnan cu ta cay bou di sistema di cuido di Aruba,” señora Tchong a expresa.

  Na final di dia, el a bisa, esaki no ta bon ni pa e ciudadano cu a tuma e riesgo riba su salud, tampoco e ta bon pa e fondo di AZV di nos pais cu lo mester carga gastonan cu no ta originalmente di AZV.

   “Recomendacion di AZV na tur ciudadano ta pa realisa kico nan kier opta p’e. Pero e peliger ta keda pa cada persona y si cos bay malo y complica, e consecuencia lo ta pa tur ciudadano cu lo por haya gastonan den sistema medico cu inicialmente no tabata destina pa e comportacion ilegal aki”, señora Tchong a enfatisa.