The content originally appeared on:
Diario
Darlaine Guedez-Erasmus (MEP):
ORANJESTAD (AAN): Hopi proyecto ta tumando lugar den e ultimo simannan. Esaki sigur ta un ehempel cu Aruba ta progresando den direccionnan hopi positivo mes. Ta trata di proyectonan di hopi beneficio pa comunidad y e bunita ta cu ta trata di proyectonan diferente. Asina Parlamentario di Fraccion di MEP, Darlaine Guedez-Erasmus a duna di conoce.
El a pone enfasis den e proyecto Wega Aruba Wiel (WAW), cu ta un proyecto caminda un bus ta pasando den e barionan cu diferente actividad pa e muchanan.
E bus di movecion, “WAW” ta un bus cu ta bay move rond di Aruba na localidadnan specifico den diferente bario.
E meta ta pa duna e hobennan den bario oportunidad pa experencia deporte y movecion en general.
Siman pasa, a cuminsa cu e actividadnan den e barionan Dakota, Bushiri, Cura Cabay Zuid y Village. Eynan por a mira con e muchanan y hobennan por a mustra nan creatividad y tambe realisa actividadnan di movecion y socialisacion.
Fundacion Cas Pa Comunidad Arubano (FCCA), CEDE Aruba, Polis y IBiSA a bini hunto pa asina por a haci e proyecto aki realidad, Guedez-Erasmus a expresa.
E parlamentario a keda masha contento di por a mira Polisnan di Bario den e actividadnan aki, compartiendo cu e hobennan, loke e ta haya hopi importante pa crea confianza y empatia entre nan.
“Nos por a mira hopi bon reaccion riba e bunita proyecto aki, cu ta un iniciativa unico. E bus cu ta bay den bario, tin tur e ekiponan pa asina e bus yega para y e muchanan mira cu kico nan kier hunga pa asina nan por start di biaha cu e weganan”.
Darlaine Guedez-Erasmus a laga sa cu e siman aki lo sigui cu e actividad di WAW den e mesun barionan caminda diferente instructor di IBiSA lo guia y siña e muchanan diferente wega. E ta haya hopi importante e parti consecuente den esaki ya cu ta crea lasonan di amistad y contactonan nobo.
Como parlamentario, a bisa, den comision, algun tempo atras a bishita FCCA y profesionalnan a indica cu proyectonan den bario ta hopi importante y banda di esey a menciona diferente idea.
“Awe por mira cu e ideanan aki a wordo realisa y cu e ‘samenwerking’ cu e otro instancianan a logra pone e ideanan hunto y cu e union a crea forsa pa e proyecto aki por a bira realidad dunando frutonan hopi bunita y exitoso unda e hobennan ta participa sanamente”.
Pa logra esaki, Gobierno di Aruba a cera un acuerdo cu CEDE ARUBA como tambe e centronan di bario pa aloca mas fondo y percura pa un restructuracion.
