Awor Gobierno kier bay refurbish un planta na Bubali Plas cu tin 53 aña bieu

Parlamentario Oduber mirando cu Gobierno no tin solucion pa RWZI

ORANJESTAD (AAN): Dialuna den Parlamento a trata un tema hopi delicado pa salud di pueblo, pa turismo y economia cu ta e situacion di e plantanan di RWZI  na Bubali Plas y Zeewijk. Un reunion cu a wordo pidi 3 Juli 2025, a dura casi 1 aña pa e reunion aki por tuma lugar cual no ta acceptabel pa un tema asina delicado cu ta e tema di RWZI.  Un tema cu ta touch bo unico pilar economico, Un tema cu henter Aruba ta wardando solucion pero ni gobierno ni presidente di parlamento no a considera esaki como prioridad.

   E problema no ta nobo, e ta un problema cu a busca solucion pa no solamente e holor insoportabel cu tin na Bubali Plas pero busca solucion structural y duradero pa e situacion cu tin.

   Ta pa es motibo nos gobierno a bin cu e idea y vision pa crea un compania nobo cu yama AWSS. E ley pa funda e compania nobo a pasa parlamento 5 juni 2024. Landsbesluit a wordo firma 18 juni 2024. Gobierno di nos a cai na September 2024. Desde 28 maart 2025 tin un gobierno nobo y desde augustus 2025 tin un director nobo pasobra esun anterior a wordo kita pa e gobierno aki. E intencion di e compania nobo tabata pa cobra turistanan $20 na yegada y asina crea un income stream cu ta structural y duradero.

   Cu e entrada cu ta wordo genera lo mester a construi 2 planta nobo segun e conseho di Royal Haaskoning cu lo tin e capacidad pa wanta e presion di e mas di 1.5 miyon turista cu Aruba ta ricibi pasobra e presion riba e planta ta bin di e turistanan. Segun e expertonan aki di Royal Haaskoning esey ta e unico solucion, no tin otro!

   Mientrasntanto gobierno a cambia, tin un gobierno nobo sinta pa 1 aña y enbez cu e situacion a bira mihor a bira pio! E holo a bira pio! E planta a bay mas atras.

   Na aña 2024, Aruba a ricibi: 1.421.615 (desde 6 september 2024 a cuminsa cobra). Si tene cuenta cu 15% ta repeat guest a cobra generadus a genera: 400.000 x $20= 15 miyon Florin. Na aña 2025 Aruba a ricibi 1.450.000 turista, y kita e 15% repeat guest: 1.2 miyon.  1.2 x $20 = 43 miyon. E compania aki a genera na entrada: 58 miyon Florin.  Nos a wordo informa cu e planta nobo lo costa 260 miyon. Bo tin un entrada garantisa di 43 miyon Florin!   Bo haya un prestamo na 8% mes bo lo mester paga 2.2 miyon pa luna 26 miyon pa aña. Ainda b’a resta 20 miyon.

  Awor diripiente a menciona cu lo bay refurbish e planta. Pueblo scucha bon e solucion di gobierno: nan ta bay refurbish un planta di aña 1972- un planta cu tin 53 aña bieu. Ta bay refurbish un planta di aña 1972? Esey mi tin compronde.

   Un planta cu nunca a wordo traha pa maneha e capacidad di turistanan. Un planta cu tin mas di 50 aña biew bo ta bay refurbish? Den serio esey ta boso solucion? Di berdad esey boso ta kere ta e solucion.