Varios mata a wordo planta den cinco baki di Linear Park na Camacuri

 “Siembra Speransa”

ORANJESTAD (AAN): Diahuebs mainta, Prome Minister mr. Mike Eman, hunto cu Daryl Lue y su team di Departamento di Obra Publico (DOW), a planta varios mata den cinco baki di Linear Park na Camacuri, banda di e cura di Aeropuerto Internacional Reina Beatrix. Den cuadro di e iniciativa “Siembra Speransa”, a planta, entre otro, ocho mata di Texas sage, dies mata di bougainvillea den diferente color, dos mata di jacaranda y 16 otro mata. Cu e plantacion aki, Gobierno ta sigui engrandeciendo e vegetacion y embeyeciendo lugarnan publico rond di Aruba.

Prome Minister Eman a splica cu e cinco baki di mata ta situa na un caminda cu tin hopi trafico di auto y hasta peaton y, aunke e proyecto ta simbolico, e ta carga un mensahe importante. “Cada biaha cu mi tabata pasa, mi tabata mira e bakinan bashi. Den bon dialogo cu DOW, nos a haci e preparacionnan necesario pa nos por planta e matanan aki cu e team completo,” Prome Minister a indica. E mandatario a menciona cu “Sembra Speransa” a cuminsa mas cu un aña pasa cu un plantacion chikito na Seroe Patrishi y cu, for di e tempo ey, diferente proyecto a wordo ehecuta entre otro Urban Pocket Park na Adriaan Lacle Blvd., e bermnan, e scolnan y nos bario­nan. El a expresa su aprecio na DOW, WEB Aruba N.V. y N.V. Elmar pa nan cooperacion den, entre otro, preparacion di tereno, instalacion di irrigacion y conexion di coriente.

Prome Minister a haci un apelacion na comunidad pa combina Dia Nacional di Limpiesa, dia 25 di juli, cu plantacion di mata. Despues di limpia un cura of bario y elimina sushi, por crea espacio pa planta un mata y asina aumenta e vegetacion den nos comunidad. “Nos por haci un esfuerso pa no solamente haci limpi, sino na mes momento sigui embeyece nos barionan, cas y comunidad. Asina nos tur ta contribui na cuido di Aruba,” el a bisa.

Preparacionnan pa Dia Nacional di Limpieza ta bayendo bon

Daryl Lue di DOW a duna un actualisacion tocante e preparacionnan pa Dia Nacional di Limpiesa. Segun Lue, DOW ta reuni diariamente cu tur e instancianan envolvi pa coordina e logistica. Tambe a tene reunion cu e supervisornan y e personanan encarga cu coordinacion, pa percura cu tur aspecto di e actividad ta bon prepara. “Di parti di DOW, nos ta haci un apelacion na comunidad: ban yuda y ban engrandece nos isla. Un Aruba limpi ta pa nos tur. Nos lo duna nos maximo esfuerso pa sostene e comunidad, pa despues nos por disfruta di un Aruba mas limpi, tanto nos mes como nos bishitantenan,” Lue a expresa.

Prome Minister Eman a gradici tur e organisacionnan, e companianan, e trahadornan y medio di comunicacion cu ta coopera pa transmiti e mensahe. El a enfatisa cu Dia Nacional di Limpiesa no ta trata solamente di kita sushi y planta mata, sino tambe di uni comunidad rond di metanan cu ta contribui na bienestar general.

“Si dia 25 di juli nos logra crea un union grandi rond di limpiesa, nos por realisa mas proyecto hunto den futuro, manera mantencion di nos scolnan, parkenan y otro luganan cu ta eleva calidad di bida di nos pueblo,” Prome Minister a conclui.

Material gratis pa Dia Nacional di Limpiesa

Den preparacion pa dia 25 di juli, diferente centro di bario lo ta habri di 8:00 or di mainta te 5:00 or di atardi. Entre e puntonan menciona tin Centro di Bario Lago Heights, Brazil, Dakota, Playa Pabou Noord y Fundacion Centro Famia Piedra Plat.

Na e centronan aki, comunidad por busca diferente material pa yuda cu limpiesa, incluyendo saco di sushi gratis pa colecta desperdicio durante Dia Nacional di Cuida Aruba.Pa mas informacion, bishita www.arubatanostur.com