FCCA ta invita comunidad pa uni na Dia Nacional pa Cuida Aruba

Señora Shahyra Loefstok di FCCA:

ORANJESTAD (AAN): FCCA lo participa na e accion nacional di limpiesa di bario cu lo tuma luga diasabra awo, 25 di juli. Gobierno di Aruba a proclama e fecha aki como Dia Nacional pa Cuida Aruba, cu e meta pa motiva comunidad pa contribui na un isla mas limpi y cuida. 

Den un entrevista cu DIARIO, señora Shahyra Loefstok di FCCA a remarca cu e iniciativa aki ta uno positivo y necesario. E ta invita clientenan di FCCA, pero tambe tur ciudadano di Aruba, pa uni na e accion y haci uzo di e oportunidad pa deshaci gratuitamente di articulo y desperdicio cu nan no ta uza mas. 

Loefstok ta motiva habitantenan pa limpia rond di cas y deposita nan desperdicio na e localidadnan designa cu lo ta disponibel den diferente parti di Aruba durante e dia.

“Esaki ta un accion nacional y un bunita iniciativa, pasobra hopi biaha ciudadanonan no tin e medio of e posibilidad pa transporta y deshaci di e desperdicio cu tin rond di cas. E oportunidad aki ta ofrece nan un manera adecuado y gratis pa haci esaki,” señora Loefstok a enfatisa. 

El a agrega cu comunidad mester uni y pone man na obra pa mantene e barionan limpi. Bisando esaki, el a haci un apelacion na personanan cu tin un pickup of otro medio di transporte pa, caminda ta posibel, yuda habitantenan cu no por transporta nan desperdicio nan mes. 

Segun Loefstok, e accion aki ta ofrece un alternativa importante pa evita cu ciudadanonan deposita sushi den luganan prohibi of crea dumpnan ilegal den bario of rond di Aruba. Door di haci uzo responsable di e localidadnan designa, comunidad por contribui activamente na un Aruba mas limpi y agradabel pa tur hende.