Un total di 10.481 contacto cu 131 den 2025

Fundacion Telefon pa Hubentud “131” den un relato amplio ta trece dilanti un recorido di su inicionan y te awendia.

Seccion Hubentud den Movecion ta presenta awe un prome articulo.

“FTPH a ser funda riba dia 26 di April 1999. Desde e tempo ey, 131 ta ofrece muchanan y hobennan na Aruba e oportunidad pa haci pregunta, ricibi informacion, y expresa nan ideanan y

sentimento diariamente. Desde 2022 y 2023, e muchanan y hobennan di Bonaire, St. Eustatius y Saba tambe por tuma contacto cu e servicionan di 131 via telefon.

“Anonimo y confidencial, e grupo meta (di 8 pa 24 aña) ta comunica cu e servicionan di 131 via e number di telefon 131, via di 131 Chat App, via email, y door di bishita 131.aw.

Tambe 131 ta duna lectura, workshop y proyecto na scolnan y otro lugarnan caminda actividadnan di mucha y hoben ta tuma luga. 131 ta ofrece un total di 26 tema di lectura,  workshop y/ of proyecto preventivo. 

E obhetivo di 131 ta pa duna informacion, conseho, y ayudo dirigi riba prevencion via telefon, internet, y/of outreach, y pa reduci problemanan bao di mucha y hoben. Pa medio di e modelo di trabao aki, e mucha y hoben ta ricibi informacion preventivo, conseho y sosten emocional, tocante diferente tema relaciona cu mucha y hoben 24 ora pa dia. E maneho structura di 131 ta ser dirigi door di nos ‘Beleidsvisie 2021-2025, Investering in de Goedheid’.

Manera tur organisacion profesional, 131 tambe ta opera basa ariba ‘organizational values’, cu pa nos organisacion ta e Tratado International di Derecho di Mucha. 131 ta un organisacion circular. Esaki ta encera cu, despues di scucha for di e mucha y hoben kiko ta tumando lugar

bao di nan, ta desaroya y implementa lectura, workshop y/of proyecto, y ta evalua e efectividad di  e lectura, workshop y/of proyecto. Na momento cu e lectura, workshop y/of proyecto ta

mustra efectividad, ta cuminsa cu implementacion pa full Aruba, Bonaire, St. Eustatius y/ of Saba. 

Basa ariba e experiencia, habilidad y conocemento crea den e ultimo 26 aña, 131 ta ser reconoci como un ‘Kenniscentrum’ riba e tereno di ‘jeugdzorg’, duna informacion, conseho,

sosten y guia na mucha y hoben, trabao outreach na mucha y hoben, conocemento di efecto cultural y etnico ariba comportacion di mucha y hoben, y involucramento di mucha y hoben den

nan desaroyo. No solamente 131 ta comparti conocemento, pero tambe ta crea conocemento.

Den aña 2025 tambe 131 a exporta conocemento den regio.  

Den aña 2025 pa medio di e instrumentonan (telefon, email, chat, lectura, workshop, proyecto

y website) cu 131 ta uza pa duna servicio, tabata tin 10.481 contacto cu 131”. Mas informacion den un otro articulo.