The content originally appeared on:
Diario
Advertencia di FDA di Merca
Tin cu ta wordo bendi na Aruba tambe
Bo tin di benta nan mesora afo y no usa nan
ORANJESTAD (AAN): E siman aki a sali na cla, cu canela mula (ground cinnamon) cu ta wordo bendi na Merca pa varios supermarket di descuento, ta contamina cu nivelnan hopi halto di chumbo (‘lead’ of ‘plomo’), y inmediatamente bo tin di benta nan afo.
U.S. Food and Drug Administration (FDA) a indica cu canela cu na Merca ta wordo bendi na e.o. Dollar Tree y tambe Family Dollar ta contene chumbo na nivelnan cu ta un peligro pa ser humano, principalmente muchanan, cu ta haya nan exponi na forma prolonga na e specerij aki.
E productonan di ground cinnamon cu a wordo inclui den alerta di FDA ta inclui esakinan:
(*) Marca “Marcum” bendi pa Save-A-Lot.
(*) Marca “La Fiesta” bendi pa La Superior.
(*) Marca “MK” bendi pa SF Supermarket.
(*) Marca “Swad” bendi pa Patel Brothers.
(*) Marca “El Chilar” bendi pa La Joya Morelense.
(*) Marca “Supreme Tradition” bendi pa Dollar Tree.
(*) Marca “Supreme Tradition” bendi pa Family Dollar.
Supermarketnan cu saca tur e productonan di canela mula aki for di rekinan, lo preveni cu nan ta bay contribui na nivelnan eleva di chumbo den cuminda di muchanan.
FDA ta adverti hende pa no cumpra e productonan aki, y tira afo cualkier boter cu nan tin na cas.
Na Merca, ya caba e tiendanan Dollar Tree y Family Dollar a saca tur boter di Ground Cinnamon for di reki. Nan a pidi clientenan pa debolbe e productonan pa por haya nan placa bek.
Peligro pa mucha: Muchanan cu ta come canela riba cuki, of basha den papa mainta, of riba cualkier otro producto, ta esnan cu mas ta bay sufri di e contaminacion di chumbo (‘lead’) den e producto aki.
FDA pa casualidad a cuminsa ta check productonan di cinnamon bendi den tiendanan di descuento, despues cu na October 2023 a bin descubri cu varios paki di “Cinnamon Applesauce” tabata hopi contamina cu chumbo (‘lead’), y cu esaki a causa cu casi 500 mucha na Merca a bira malo.
E biaha aki, e boternan di ground cinnamon tabatin nivelnan di 2.03 te cu 3.4 “parts-per-million” cu toch ta menos cu e Cinnamon Applesauce di biaha pasa, cu tabata contene 2.270 parts-per-million te cu 5.110 parts-per-million di chumbo.
Te cu Diahuebs, ainda ningun informe a drenta di muchanan cu a bira malo, of otro efecto di salud relaciona cu e alerto di ground cinnamon aki.
Por a nota cu e siman aki ainda e boternan di Ground Cinnamon di marca Marcum ta riba rekinan na benta na Aruba. No ta conoci si acaso Departamento di DVG a wordo avisa caba di e productonan aki cu ta contamina, y cu manera por mira riba e potret, tey keto bay poni riba reki na Aruba.
Corda cu den asunto di chumbo, no ta existi ningun “nivel safe” di wordo exponi na chumbo pa humanonan. Esnan exponi pa periodo largo, tin di corda cu chumbo por causa problema, specialmente cerca muchanan cu ta creciendo, incluyendo cu nan lo por haya problema den siñamento, dificultad di comportacion, y tambe nan inteligencia lo bira menos.
