Boulevard a haya 101 mata nativo pa embeyece y fortalece biodiversidad

Aruba ta planta futuro durante ceremonia di plantacion na Henny Eman Boulevard

ORANJESTAD (AAN): Riba Dia di Rey den un evento simbolico  Gobierno di Aruba cu su departamento di Directie Natuur en Milieu (DNM), Dienst Openbare Werken (DOW) hunto cu Aruba Airport Authority N.V. (AAA) y Aruba Convervation Foundation (ACF) a uni nan bos pa un causa comun: restaura Aruba su naturalesa y fortifica sostenibilidad como base di desaroyo di pais.

   Cada discurso a agrega un capa importante na e mesun vision comparti cu ta un Aruba mas berde, mas consciente y mas conecta cu su identidad natural y cultural. E iniciativa aki ta parti di un strategia nacional cu ta enfoca riba restaura naturalesa, fortalece biodiversidad y crea un Aruba mas berde, limpi y sostenibel. E ceremonia di plantacion di matanan na Henny Eman Boulevard ta forma parti di e programa nacional di reforestacion impulsa bou liderazgo di Prome Minister Mike Eman.

   E proyecto rib’e berm (separador) pabao di e rotonde di Aeropuerto Internacional Reina Beatrix riba Henny Eman Boulevard ta un ehempel concreto di e enfoke aki, unda restauracion di vegetacion nativo ta bay hunto cu desaroyo urbano responsabel

   Prome Minister mr. Mike Eman a presenta e vision mas amplio y historico. Premiere Eman a recorda cu Aruba a perde casi 70% di su vegetacion y cu esaki ta haci reforestacion un prioridad nacional urgente. Den colaboracion cu AAA, DOW, ACF y otro partner, gobierno ta comprometi pa planta centenares di mata y palo como parti di un esfuerso continuo. Segun e Prome Minister, e seleccion di e ubicacion ta strategico, pa asina combina reforestacion cu embeyecimento di nos entorno urbano.

   Den marco di e prome fase, plantacion di mata, realisa cu apoyo logistico di Fantastic Gardens y Aruba Conservation Foundation. Den total a  planta 101 mata, di cual 78 tabata entrega door di Fantastic Gardens y 23 door di Aruba Conservation Foundation. E variedad di mata a inclui 10 Lily, 10 Croton Mix, 40 Carissa, 20 Beishi Lama y 4 Oleander di Bonaire. Adicionalmente, durante e ceremonia di Dia di Rey, a planta 4 Wayaca Macho grandi como simbolo central di e iniciativa.

   Tyson Lopez, CEO di Aruba Conservation Foundation (ACF), a hiba un discurso rib’e rol di naturalesa den un Aruba moderno. Den e proyecto rib’e berm na Henny Eman Boulevard ACF ta activamente envolvi den plantacion di 23 mata nativo di cual varios ta diferente especie, cada un cu su rol den sostene Aruba su balansa ecologico.

   Minister di Turismo, Transporte y Labor mr. Wendrick Cicilia a conecta turismo cu responsabilidad ambiental. Cicilia a enfatisa cu plantamento di mata no ta solamente un acto simbolico, pero un accion cu un impacto directo riba comunidad y imagen di Aruba como destinacion. E mandatario tambe a señala su compromiso pa cu crea un area similar n’e berm di Henny Eman Bouelvard den area di turismo crucero rond di Waf di Oranjestad.

   Angeline Flemming cu ta director di salud y sostenibilidad na Aruba Airport Authority N.V. a enfatisa cu awor conoce un transformacion importante den e strategia corporativo di AAA N.V., unda sostenibilidad no ta un proyecto apart, pero un componente central di nan vision pa futuro. Flemming a subraya cu e programa Wings of Hope, un comision boluntario di e empleadonan di AAA N.V., ta activamente envolvi den varios proyecto comunitario durante henter aña. Asina ta contribui directamente n’e 17 Metanan di Desaroyo Sostenibel (SDGs na ingles). Un ehempel concreto di esfuersonan di AAA N.V. ta su colaboracion cu Aruba Conservation Foundation (ACF), den cual nan a desaroya un greenhouse pa planta matanan nativo, cu e meta pa yuda restaura e ecosistemanan local y fortalece Aruba su biodiversidad.

   E trabaonan di plantacion y excavacion ta bou coordinacion di DOW, mientras cu partnernan tecnico a facilita entrega y preparacion di e matanan. Despues di completacion di e plantacion, autoridadnan y partnernan lo evalua e area pa determina si lo ta necesario agrega mas vegetacion. E proyecto ta forma parti di un esfuerso mas amplio pa reforestacion riba e isla, cu enfoque riba uzo di matanan nativo pa proteha ecosistema local y crea un paisahe mas berde y sostenibel.

   Minister di Vivienda, Infrastructura, Servicio Interno y Telecomunicacion drs. Rene (Baba) Herde a amplia e concepto di infrastructura, splicando cu e no ta solamente fisico, pero tambe social y natural. Minister Herde a enfatisa cu infrastructura teniendo cuenta cu nos naturalesa ta esencial pa futuro di Aruba, y cu plantamento di mata no ta solamente simbolico pero e ta un proceso largo cu ta djis cuminsando.

   Prome cu e atardi a finalisa den e ceremonia Prome Minister Mike Eman, Minister Wendrick Cicilia, Minister Geoffrey Wever y Minister Rene Herde hunto a planta 4 mata di Wayaca Macho. Cu e ceremonia aki, Aruba a marca un paso concreto den su vision pa un futuro mas berde, unda colaboracion entre sector publico, priva y comunidad ta resulta clave pa logra impacto duradero. Planta un mata na Aruba no ta solamente un accion ambiental, e ta planta futuro, identidad y responsabilidad pa e siguiente generacion.