Dama di Aruba tambe a keda herida na piramidnan cerca di Ciudad di Mexico

Homber a cuminza tira riba turistanan

ORANJESTAD (AAN): Un situacion di panico a presente su mes na e famoso piramidnan di Teotihuacán, cu ta situa como 30 km Noordoost di Mexico City.  Un homber a subi mas na halto riba e piramid aki, y cu un arma di candela a cuminza tira pa loco.

   Resultado di esaki ta cu un persona a perde su bida, esta un muhe Canades di como 20 aña di edad a perde su bida, y como 7 hende a ser herida cu impacto di bala.  Seis otro turista a keda herida, ora cu nan a trata di huy y cay for di e trapinan.  Na final e homber a dicidi na mata su mes cu e arma.

   Polisnan cu a yega na careda, a bin haya un revolver di caliber .38, municion, y tambe un cuchiu cualnan tur a ser confisca.  Kico e motibo ta cu e homber a cuminza tira, no ta conoci pero investigacion lo por haya sa esey despues.  Tin indicacion cu e ta un homber Mexicano di como 35 aña di edad, y e tabatin problemanan psicologico.

   Entre e 13 hendenan cu a keda herida, tin dos menor di edad, tambe diferente turista.  Seis ta di Merca, tres di Colombia, dos di Brasil, un Canades, un Ruso, y un dama turista procedente di Aruba.

   E dama di Aruba a wordo identifica como Francis Rivero, un dama di 55 aña naci na Venezuela pero cu tin nacionalidad Hulandes.

   E no a ricibi impacto di bala, pero ora cu e tiramento a start el a busca forma pa huy di halto, y el a dicidi na bula di un pida basta halto pa asina scapa.  Den e bulamento aki el a ricibi golpi na un pia y un pols.

    Señora Rivero ta traha den sector di Hotel na Aruba, y e tambe mester a duna declaracion na autoridadnan Mexicano.

   E tiramento a cuminza banda di 11:30 am, net ora cu tabatin monton di turista eynan.  Decenas di turista tabata na halto riba e piramid cu tin un dak plat.  Esaki ta wordo yama “Piramide de la Luna”, y e tin un haltura di 45 meter.

   Ministerio di Buitenlandse Zaken na Hulanda a bisa cu oficialmente nan no sa mas detaye di e dama di Aruba, como cu e no a bay busca yudansa di Embahada Hulandes na Mexico City.