Parlamentario di AVP, Jennifer Arends-Reyes:
ORANJESTAD (AAN): Cu motibo di Dia Internacional di Mucha, parlamentario y lider di Fraccion AVP, Jennifer Arends-Reyes, ta reafirma su compromiso cu un Aruba unda cada mucha por crece cu siguridad, dignidad, amor y oportunidad. E parlamentario ta pidi pa Aruba fortalece prevencion y amplia e sosten cu muchanan y nan famianan tin na nan alcance.
“Como parlamentario y como mama, mi ta kere firmemente cu proteccion di nos muchanan no ta solamente un responsabilidad di famia. Ta un deber di nos sociedad henter,” Arends-Reyes a expresa.
Prevencion
Arends-Reyes ta boga pa fortalece educacion, amplia acceso na cuido di calidad y crea mas oportunidad pa muchanan participa den actividadnan educativo y recreativo despues di scol. E ta pidi tambe pa duna mas atencion na salud mental, proteccion contra violencia y abuso, y sosten na famianan cu ta enfrenta desafio.
Segun e parlamentario, prevencion ta cuminsa cu atencion y guia den bida diario. Cada mucha mester tin un ambiente sigur pa desaroya su talento y sa cu tin adulto cu ta scuch’e y apoy’e. Pa identifica señalnan di riesgo na tempo y brinda e sosten necesario, famia, scol, institucionnan y gobierno mester traha hunto.
Inversion
Pa Arends-Reyes, inverti den bienestar di mucha ta un paso pa construi un Aruba mas husto, sigur y inclusivo, unda cada mucha tin oportunidad pa desaroya su potencial. E ta subraya cu ta responsabilidad di adultonan y di sociedad henter pa proteha e derechonan di mucha y crea e condicionnan pa nan crece cu bienestar y speransa. “Un mucha no mester lucha so pa su derechonan wordo respeta. E futuro di Aruba ta cuminsa awe, den e manera cu nos cuida y guia nos muchanan,” Arends-Reyes a conclui, deseando comunidad un feliz Dia Internacional di Mucha.
Related News
Cu Helicopter a bay evacua mucha chikito di barco crusero
FIFA lo regala Aruba un total di 300 par di zapato di futbol
Prome Minister Mike Eman a rindi homenahe na e heroe Arubiano Boy Ecury