Local News

Aruba lo otorga djis un permiso temporal di 3 aña na stranheronan di riba 30 aña di edad

21 November 2026
This content originally appeared on Diario Online.
Promote your business with NAN

Medida nobo entrante Januari 2027

  • Tur esaki pa sostenibilidad di fondonan social 

ORANJESTAD (AAN): Manera cu DIARIO a indica desde siman pasa caba, Gobierno di Aruba ta introduciendo medidanan nobo pa cu admision di stranhero, y tambe di trahadornan di exterior.

   E siman aki, Ministro Arthur Dowers a tene un conferencia di prensa pa elabora riba esaki.  Y un di e medidanan ta loke ta wordo tuma riba tur stranhero kendenan ya caba tin mas di 30 aña di edad y cu entrante 1 Januari 2027 lo no ricibi mesun tipo di permiso compara cu esnan menor di 30 aña.

   Ministro Dowers a indica cla y raspa, cu si abo como stranhero tin mas di 30 aña di edad, ora cu bo aplica pa permiso di trabao, lo bo haya uno ‘temporal’ di maximo 3 aña di validez.

   E buelta importante den e reglanan pa cu maneho di permiso di estadia, ta pone cu tur peticion pa hendenan cu kier biba permanentemente riba Aruba, lo wordo limita na stranheronan cu tin bao di 30 aña di edad.

   Den mesun rosea, Ministro Dowers a aclarea cu e medida aki ta wordo introduci pasobra tin di proteha tanto e futuro di e solicitante, como tambe sostenibilidad di fondonan social y di pensioenfonds di Aruba.

   E titular di Husticia a indica cu nan a haci investigacion y ripara cu tin hopi peticion di stranheronan di 60 aña di edad, kendenan ta pidi permiso te cu nan haci 65 aña.  Awendia e pensamento cu pa un stranhero drenta e isla na un edad asina halto, no ta cuadra cu e planeamento sostenibel pa futuro, y tampoco cuadra cu e realidad financiero di e sistema social.

   Bao di 30 aña: E reglamentonan nobo entrante 1 Januari 2027 ta cu pa un stranhero biba na Aruba, solamente esnan cu tin 30 aña of menos lo por pidi un permiso pa asina keda biba na Aruba.

   Riba di 30 aña: Stranheronan cu a sobrepasa e edad di 30 aña, y cu kier bin Aruba... cu e medida nobo por aplica solamente pa un permiso temporal, cu lo dura maximo 3 aña.  Si acaso e stranhero tin 65 aña caba y ta haci peticion... e lo no haya nada.

   Proteccion Fondo di Pensioen: Ministro Dowers a declara, cu tin estudionan haci pa cu acumulacion di pensioen segun edad na cual e stranhero a drenta Aruba.   Si un stranhero drenta cu 18 aña di edad (of menos), pa ora e yega edad di pensioen e por ricibi e pensioen completo di 1.313 Florin.   Pero un stranhero cu drenta Aruba cu 62 aña di edad, lo ricibi apenas 84 Florin.

   Un stranhero cu drenta Aruba cu 45 aña di edad, lo bay ricibi apenas 600 Florin maximo di pensioen, y esey ta un suma cu no ta suficiente pa biba di dje.  Un stranhero di 30 aña cu keda traha te ora e cumpli 65 aña, lo cobra como 978 Florin di pensioen.