Tin solucion inovativo pa yuda hoben y famia logra nan propio cas

Parlamentario Dangui Oduber:

• Aruba tin un problema grandi di vivienda 

ORANJESTAD (AAN): Mientras Aruba ta registra un surplus presupuestario di aproximadamente Afl. 700 miyon, e crisis di vivienda ta sigui ta un di e retonan mas grandi pa e ciudadanonan. Awe, ainda miles di famia ta riba lista di espera pa un vivienda, mientras cu pa e hobennan, e soño di cumpra nan prome cas ta birando cada biaha mas dificil.  

   Segun Parlamentario Dangui Oduber, a yega e momento pa Aruba laga e manera tradicional di pensa atras y cuminsa haci uzo di tecnologia y solucionnan financiero moderno pa enfrenta e crisis di vivienda.

   E realidad di e crisis di vivienda: “Nos mester pensa diferente y cuminsa uza tecnologia nobo. Un Gobierno cu tin un surplus di 700 miyon Florin no por bisa un famia cu no tin recurso pa yuda nan logra un cas. E problema no ta solamente placa; e sistema y e mentalidad mester cambia,” e parlamentario a expresa na DIARIO.

   E realidad actual ta preocupante: Aruba ta enfrenta un demanda pa miles di vivienda, mientras cu e cantidad di tereno cla pa construccion ta limita. Na mes momento, e prijs di casnan a subi hopi mas lihe cu e salarionan, haciendo e acceso na un vivienda cada biaha mas dificil pa famianan y pa e hobennan.

   “Mi ta topa hobennan cu ta traha full-time, parehanan caminda tur dos ta traha, cu ta spaar y haci sacrificio, pero toch no por logra adkiri un cas. Nos no por acepta cu un generacion completo bira huurdo pa semper, simplemente pasobra nos sistema no a modernisa,” Dangui Oduber a remarca.

   Bo Cas, Bo Soño: Oduber ta propone e iniciativa “Bo Cas, Bo Soño”, un plan cu ta combina vivienda, tecnologia y innovacion financiero, sin e necesidad di crea belasting nobo ni di carga e pueblo cu mas debe. E plan ta basa riba e siguiente pilarnan principal:

   (1.) Bo Placa, mas balor pa Aruba.

   Miles di trahado na Aruba ta manda placa pa nan famianan den exterior, pagando costonan halto di transferencia y margen riba cambio di moneda. Pa e motibo aki, Oduber ta propone pa investiga un sistema digital moderno pa transferencia di placa cu por baha e costonan aki.

   E modelo aki por wordo desaroya bou di un supervision financiero adecuado, uzando infrastructura y licencia existente unda ta posibel. E entrada genera pa Estado mediante e sistema aki por wordo destina directamente na un fondo pa subsidia vivienda pa famianan riba lista di espera.“En bes di laga costo di transferencia sali di Aruba, nos por modernisa e sistema y uza parti di e balor genera pa yuda construi futuro aki mes,” Oduber a splica.

   (2.) No Bende Bo Crypto pa Cumpra Cas.

   Hobennan cu durante añanan a spaar of inverti den activonan digital manera Bitcoin mester tin e posibilidad, bou di reglanan cla y transparente, pa e activonan digital aki (debidamente verifica) forma parti di e evaluacion di nan capacidad financiero pa haya un hipoteca.

   “Si un hoben a spaar cu disciplina, nos sistema financiero mester busca un manera responsabel pa reconoce e patrimonio ey, y no simplemente ignor'e,” Parlamentario Oduber a enfatisa.

   Innovacion cu responsabilidad y vision pa futuro: Oduber ta enfatisa cu e propuesta ta pa considera e rol cu Bitcoin y e tecnologia moderno por tin pa e hobennan por yega na e financiamento di nan cas, semper bou di supervision estricto y cu reglanan cla pa crea oportunidadnan nobo.

   Segun e parlamentario, Aruba no por enfrenta e reto di vivienda actual cu solucionnan di pasado: “Nos hobennan ta biba den un mundo digital, p’esey nos plan di cas mester ta digital tambe. Tras di cada cifra tin un famia cu ta warda. Nan no ta pidi un regalo; nan ta pidi un oportunidad pa construi nan propio futuro,” Oduber a declara.

   E parlamentario a conclui señalando cu e lo sigui desaroya e plan “Bo Cas, Bo Soño” como un propuesta legislativo, cu e meta di crea posibilidadnan real y concreto pa cada hoben y famia Arubiano logra adkiri nan propio hogar.