Homber di 63 aña cu a abusa di mucha muhe di 15 aña condena na 2 aña y 6 luna di prizon

Hues a confirma exigencia di Fiscal

ORANJESTAD (AAN): Dialuna mainta e homber C. di 63 aña a presenta dilanti Hues pa scucha su sentencia. Hues a bisa cu e ta haya C. culpabel di a tene relacion sexual cu e mucha T., kende e tempo ey tabatin 15 aña. Ta asina cu e mucha ta famia di C. Hues a confirma e exigencia di Fiscal y a condena C. na 2 aña y 6 luna di prizon, di cual 10 luna ta condicional cu un tempo di prueba di 3 aña.

   Fiscal a exigi 2 aña y 6 luna di prison: Algun siman pasa, e caso penal a wordo trata caminda caminda Fiscal ta acusa C. cu den e periodo di 21 October 2022 y 5 September 2024 el a tene relacion sexual cu e mucha muhe T. menor di edad. Tambe C. ta wordo acusa di a purba tene relacion sexual cu e mucha muhe T.

   Fiscal a bisa Hues cu e ta haya e declaracionnan di e mucha T. no ta mucho cla y consistente. Pero por conclui cu T. tabata wordo hiba pa su omo C. school y a haya un Apple iPhone for di C. y cu cu T. mester a paga C. door di tin relacion sexual cun’e. Fiscal a mustra cu C. tabata bay apartamento di cita cu intension di tene relacion sexual pero T. a nenga. Fiscal a sigui bisa cu e mucha T. a conta otro situacion caminda atrobe a bay na un apartamento di cita, caminda C. lo a hinca dede na su parti intimo. E tempo ey e mucha tabatin 15 aña.

    Fiscal ta haya cu tin declaracionnan di T. cu no ta consistente. Esaki ta haci dificil pa tin un declaracion completo. El a mustra cu Polis a haci investigacion riba e declaracionnan y a bay busca prueba di sosten. Fiscal ta haya cu tin prueba di sosten. El a mustra cu tin chatnan entre C. y T. caminda por compronde cu C. kier tin relacion sexual cu T. Fiscal ta haya C. culpabel di a haci actonan inmoral cu T. y a exigi 30 luna di prizon di cual 10 luna ta condicional cu 3 aña di prueba.

   Culpabel di a abusa di mucha: Dialuna Hues a bisa cu e ta haya legalmente proba cu C. a abusa di e mucha muhe T. Hues ta haya cu e victima no tabata consistente den su declaracionnan pero cu su declaracionnan ta haya suficiente prueba di sosten a base di e chatnan entre C. y T. Hues a mustra cu C. tabata chat cu T. tocante tene relacion sexual. Hues a sigui bisa cu e mucha T. a duna descripcion na Polis di e apartamentonan di cita cu C. a hib’e. Hues a bisa cu C. a admiti cu el a bay cu T. na e apartamento di placer na Meiveld.

   Hues a mustra cu e mucha T. a bisa cu el a haya un iPhone di C. en cambio di tin relacion sexual cu C. Hues a bisa cu tin problema tecnico pa cu e acusacionnan caminda Fiscal ta papia di e abuso y intento di abuso. Hues a mustra cu T. ta papia di 3 caso. Hues a haci adaptacion den e acusacion ya cu a papia di tur 3 caso durante tratamento di e caso. Hues ta haya cu C. tabatin relacion sexual cu e mucha y dos biaha a purba di tene relacion sexual.

    Pa cu e castigo, Hues a mustra cu victimanan ta keda afecta. Hues a bisa cu e ta tene na cuenta cu e circumstancia personal di C. y tambe cu e señora di C. ta malo y ta depende di C. Hues a confirma exigencia di Fiscal y a condena C. na 30 luna di prizon (2 aña y 6 luna), di cual 10 luna ta condicional cu un tempo di prueba di 3 aña.