Selibon ta mira oportunidad pa probecha capacidad di cada isla den maneho di sushi

ORANJESTAD (AAN): E director Interino di Selibon, Edsel Winklaar, ta mira e posibilidadnan concreto pa fortalece colaboracion entre Aruba, Boneiro y Corsou den e maneho di sushi.

Durante un reunion na Selikor na Corsou, Winklaar a resalta cu, aunke cada isla tin su propio manera di atende e problematica di desperdicio, e tres islanan ta comparti reto similar y tin oportunidad pa traha hunto riba solucion mas efectivo.

E reunion a conta cu participacion di Prome Minister di Aruba, Mike Eman, y representantenan di Selikor y Selibon. E encuentro ta un continuacion di e conversacionnan cu a tuma luga na Boneiro, caminda a discuti posibilidad pa e tres islanan amplia nan colaboracion den coleccion y procesamento di desperdicio.

Durante e reunion na Corsou, Selikor a presenta su plannan y ideanan pa e futuro di maneho di desperdicio. Prome Minister Eman tambe a comparti su vision y e propuestanan pa un acercamento regional.

Segun Winklaar, e conversacionnan a demonstra cu, apesar di e diferente ideanan y acercamentonan, tin un direccion comun entre e instancianan involucra.

Probecha capacidad di cada isla

Un di e puntonan importante cu a sali dilanti durante e reunion ta e posibilidad pa probecha e capacidad y facilidadnan cu cada isla tin disponibel. Winklaar a splica cu e siguiente paso ta pa duna mas contenido na e ideanan presenta y determina con e tres islanan por combina nan recursonan y capacidadnan pa yega na solucionnan efectivo.

E director interino di Selibon a indica cu e intencion ta pa continua e conversacionnan despues cu Prome Minister Eman regresa di su proximo bishita na Hulanda. Durante e siguiente encuentro, e intencion ta pa involucra otro instancianan y representantenan di e sector, cu e meta pa transforma e ideanan den propuestanan concreto.

Boneiro ta habri pa colaboracion regional

Winklaar a confirma cu e autoridadnan concerni na Boneiro ta habri pa explora e posibilidadnan di colaboracion. E asunto a ser discuti cu e diputado concerni y su conseheronan, kende tambe a mustra ta dispuesto pa considera diferente alternativa.

E director interino di Selibon a enfatisa cu e tres islanan ta enfrenta problemanan comun den e tratamento di desperdicio. Aunke e acercamento di cada isla por ta diferente, e meta principal ta similar: haya un solucion cu por contribui na un maneho mas eficiente y sostenibel.

E reunion na Selikor ta representa un siguiente paso den e dialogo entre Aruba, Boneiro y Corsou, cu e intencion pa desaroya un colaboracion regional cu por beneficia tur tres isla.

E expectativa ta cu e proximo encuentro lo permiti e instancianan involucra pa defini e posibilidadnan concreto y determina con nan por traha hunto pa atende e problematica di desperdicio.