Inverti den nos hobennan ta inverti den e Aruba di mañan

Parlamentario Jennifer Arends-Reyes:

ORANJESTAD (AAN): Parlamento di Aruba a ricibi bishita di un delegacion di Comision di Asuntonan di Reino di Tweede Kamer di Hulanda durante un sesion di intercambio di informacion. E encuentro a ofrece oportunidad pa comparti y dialoga tocante temanan importante pa e relacionnan den Reino.

   Durante e reunion a papia, entre otro, tocante e pasado di sclavitud, leynan di Reino basa riba consenso (consensusrijkswetten), HOFA y criminalidad entre hobennan.

   Parlamentario Jennifer Arends-Reyes a comparti informacion tocante proyectonan di AIOF y e Landspakket, cu atencion pa e importancia di inversion y reformanan cu ta contribui na desaroyo di Aruba y bienestar di su pueblo y hobennan.

   Den e intercambio tocante hobennan, Jennifer a trece dilanti e importancia di prevencion, educacion y deporte. Atencion pa nos hubentud mester cuminsa tempran, cu orientacion, acompañamento y oportunidad pa desaroya talento, tanto den como pafor di scol.

   Den e cuadro aki, el a destaca tambe e importancia di un vision pedagogico y di opvang y actividadnan despues di scol pa studiantenan di enseñansa secundario. Un ambiente sigur y structura, caminda hobennan por ricibi guia, practica deporte y participa den actividadnan educativo y creativo, por contribui na nan desaroyo y perspectiva pa futuro.

   Pa Jennifer, e conexion entre educacion, deporte y prevencion ta merece atencion continuo. Inversion den nos hobennan ta inclui tanto facilidadnan adecua como e personanan, programanan y acompañamento cu nan tin mester pa progresa. E bishita di e delegacion di Tweede Kamer a brinda espacio pa un intercambio. Pa Jennifer, ta importante pa sigui cu e dialogo aki, compartiendo tanto nos retonan como e iniciativanan cu ta contribui na un Aruba mas fuerte, cu mas oportunidad pa nos generacionnan cu ta bin.