Telefon pa Hubentud ta colabora cu 45 partner pa bienestar di mucha y hobennan
Segun James Sneek:
ORANJESTAD (AAN): Den cuadro di celebracion di 27 aña desde cu e prome mucha a haci uzo di su servicio di yamada gratis, y den conexion cu Dia Internacional di Derechonan di Mucha, Telefon pa Hubentud ta sigui comparti informacion y organiza actividadnan di conscientisacion dirigi na mayornan, muchanan y hobennan.
James Sneek di Telefon pa Hubentud a informa cu e organizacion ta colabora actualmente cu 45 partner local y internacional. Entre e partnernan local tin Bureau Sostenemi y dokternan di cas. E meta ta pa fortifica e conexion entre e diferente instancianan, di manera cu mucha y hobennan cu tin mester di sosten por ricibi e ayudo adecuado mas pronto posibel.
Segun Sneek, e realidad den cua mucha y hobennan ta crece ta cambia constantemente, mientras cu e mundo online tin un impacto grandi riba nan bida. Pa por responde na e desaroyonan aki, Telefon pa Hubentud ta conta cu colaboracion di su partnernan. El a subraya cu e organizacion tin e responsabilidad di acerca e instancianan concerni y establece protocolnan di cooperacion cu ta facilita e acceso na ayudo.
Sneek a splica cu, ora un instancia ricibi un caso referi, e ta informa Telefon pa Hubentud cu e caso ta wordo atendi, respetando anonimidad di e mucha of hoben. E seguimiento aki ta importante, tanto pa confirma cu e persona ta ricibi sosten como pa por orient’e debidamente ora e tuma contacto bek cu e organizacion.
Mucha y hobennan ta wordo stimula pa bolbe tuma contacto cu Telefon pa Hubentud. Esaki ta permiti e organizacion mantene bista riba e proceso y sa si nan a ricibi e atencion cu nan mester.
Den caso di muchanan menor di edad, e acercamento na e instancianan concerni ta tuma luga hunto cu nan mayornan, pa nan por ricibi e ayudo necesario.
Sneek a enfatisa cu, den un realidad cu ta cambia constantemente, ta esencial pa sigui monitor e yamadanan cu ta drenta via e linea gratis 131. Alavez, ta importante pa evalua continuamente cua partnernan por contribui na un colaboracion efectivo pa bienestar di mucha y hobennan na Aruba.
Related News
Diferente reunion den Parlamento pa e ultimo dos lunanan di aña
Gobierno ta fortalece cooperacion nacional pa proteha integridad di sistema financiero y e...
Aruba Fair Trade Authority ta batiendo alarma pa posibel riesgo den Ennia Aruba