Local News

Aruba Fair Trade Authority ta batiendo alarma pa posibel riesgo den Ennia Aruba

18 November 2026
This content originally appeared on Diario Online.
Promote your business with NAN

Kizas un competidor ta bay participa den Ennia Aruba...

  • Aunke ainda ningun transaccion a tuma lugar
  • AFTA a investiga posibel consecuencianan 

ORANJESTAD (AAN): Riba Diamars atardi, oficialmente Aruba Fair Trade Authority (AFTA) a emiti un boletin pa raporta riba algo alarmante.  E grupo di AFTA cu ta fungi como un sorto di ‘watchdog’ ta señala riesgonan potencial pa competencia den caso di un posibel participacion di un competidor den Ennia.

   Segun AFTA, nan a haci un analisis preliminario di e posibel consecuencianan den area di competencia si un competidor haya, direct of indirectamente, un interes financiero den Ennia Aruba. Den esaki, AFTA ta señala riesgonan potencial pa competencia dentro di e sector di seguro na Aruba.

   Aunke ainda ningun transaccion a tuma luga y, na e momento aki, no tin un infraccion constata.  AFTA lo evalua si e transaccion final ta duna motibo pa inicia un investigacion formal.

   Informacion general: Ennia Aruba ta forma parti di grupo Ennia, cu den e ultimo añanan a pasa door di un restructuracion despues di problemanan financiero serio relaciona cu su actividadnan na Corsow y Sint Maarten. Ennia Aruba no a wordo afecta door di e problemanan aki y a sigui opera independientemente na Aruba. Den cuadro di e proceso final, ta buscando un doño nobo pa Ennia Aruba. Den e proceso di benta, a presenta ofertanan preliminario. Den por lo menos un di e posibel structuranan di benta, un competidor den e sector di seguro ta envolvi.

   Como resultado di e proceso di benta, directiva di Ennia Aruba a inicia un caso sumario na Corte Comun di Husticia. Den e caso sumario ey tambe a surgi e pregunta si participacion di un competidor por trece cuestionnan relaciona cu ley di competencia. AFTA a haci un analisis preliminario a base di esaki.

   Investigacion di AFTA: AFTA a investiga cual por ta e posibel consecuencianan di un participacion financiero entre competidornan. Un interes financiero directo of indirecto di un competidor den un otro competidor por, dependiendo di su tamaño y structura, influencia e incentivanan pa nan sigui competi cu otro di forma completamente independiente y vigorosamente. Tambe por surgi preguntanan tocante acceso na informacion sensitivo pa competencia y e independencia cu cual decisionnan commercial ta wordo tuma.

   Si esaki ta realmente ta presenta den un caso concreto, ta depende di e structura y circunstancianan final. E evaluacion final bou di derecho di competencia ta depende, entre otro, di e tamaño y structura di e participacion, e derechonan relaciona cu ne y e manera cu e empresanan concerni ta mantene efectivamente nan independencia comercial y informacion sensitivo pa competencia separa.

   Pakico ta importante pa Aruba: Competencia ta funciona mihor ora aseguradonan ta tuma nan decisionnan tocante nan prijsnan, productonan, calidad y servicio independientemente. Pa consumidornan ta importante pa aseguradonan sigui competi efectivamente cu otro. Menos presion competitivo por eventualmente tin consecuencia pa, entre otro, primanan, condicionnan di producto, calidad, servicio, escogencia y innovacion.

   Esaki no ta nifica cu tal consecuencianan ya a wordo constata den e caso aki.

   Con ta sigui: Ainda no a tuma luga ningun transaccion y, na e momento aki, no tin un infraccion constata. AFTA lo evalua, a base di e transaccion final y e hechonan cu lo ta disponibel e momento ey, si tin motibo pa inicia un investigacion formal tocante un posibel infraccion di e Mededingingsverordening. Si un investigacion formal mustra cu tin un infraccion, AFTA por impone un boet y tuma medidanan pa termina e infraccion.