The content originally appeared on:
Diario
ORANJESTAD (AAN): Tabata Diaranson anochi trempan, cu Central di Polis a ricibi notificacion cu un accident a keda registra riba caminda di Paradera pa Jaburibari, unda un vehiculo a bolter y tin hende herida.
Inmediatamente a mobilisa tanto patruya di Polis, como tambe Ambulans pa e lugar. Tambe a dicidi na manda Vehiculo di Rescate di Cuerpo di Bombero, como cu yamadanan tabata drenta indicando cu tin hende pega den e mini-SUV aki.
E accident a socede net panort di e parkinglot di Stichting Thuiszorg Aruba, na altura di e verkeersplateau cu tin dilanti cas Jaburibari #1. Ta parce cu e Suzuki Vitara cu number A-39877 a baha di caminda, dal den un baranca banda di e verkeersplateau, y aki a bolter y a keda di banda riba caminda.
E persona masculino di edad grandi no por a sali di e vehiculo, como cu e ta di banda y tin presion enorme riba e seatbelt cu tine wanta keto bay safe. Pues tabata duro pa primi e boton pa ‘unbuckle’ e seatbelt. Ora cu Bomberonan a yega, a dicidi pa djis corta e seatbelt.
Asina por a saca e persona. Mas despues a bolter y pone e vehiculo bek riba su cuatro wielnan.
Cu Ambulans a transporta e herido pa Servicio di Emergencia na Hospital. Polis a laga e caminda aki cera pa basta rato, pa asina Specialista di Trafico por a haci su investigacion. E lo determina si acaso velocidad halto a hunga un rol, of e verkeersplateau, of e chauffeur no tin conocemento di e caminda.
